වහාම රට තුළ උද්ගත වී ඇති ආහාර සැපයුම් ගැටලු විසඳීමට කටයුතු කරන ලෙස උතුරු කොරියානු නායක කිම් ජොන් උන් සිය නිලධාරීන්ගෙන් ඉල්ලා සිට ඇතැයි ජ්‍යාත්‍යන්තර මාධ්‍ය වාර්තා කර තිබෙනවා.
ඔහු එහිදී දේශගුණික විපර්යාසයේ අවදානම අවධාරණය කරීමට ද කටයුතු කර ඇති බවයි එම වාර්තා පෙන්වා දෙන්නේ.
පසුගිය වසරේ ඇති වූ සුළි කුණාටු අත්‍යවශ්‍ය බෝග වලට නරක ලෙස බලපෑ අතර සති ගණන් නියඟය සහ අධික මෝසම් වර්ෂාව හේතුවෙන් මේ වසරේදී ද ඒවාට හානි සිදු වීම හේතුවෙන් රට විශාල ආහාර හිඟයක් වෙත යමින් සිටින බව පැවසෙනවා.
බ්‍රහස්පතින්දා ආණ්ඩු පක්ෂයේ දේශපාලන මණ්ඩලය අමතමින් කිම් ජොන් උන් සදහන් කළේ එම තත්ත්වය මධ්‍යයේ “අසාමාන්‍ය දේශගුණය” මැඩපැවැත්වීම සඳහා පියවර ගත යුතු බවත් නියඟය සහ ගංවතුර තත්ත්වය පාලනය කිරීමට කටයුතු කරන ලෙසයි.
පසුගිය වසර කිහිපය තුළ දේශගුණික විපර්යාසයන්ගේ “අවදානම” ඉහළ ගොස් ඇති අතර “හදිසි පියවර” ගත යුතු බව ඔහු මෙහිදී අවධාරණය කර තිබෙනවා.
ස්වාභාවික විපත් වලින් සිදු වූ හානිය මෙන්ම කොවිඩ් පැතිරීම වැළැක්වීම සඳහා දේශ සීමා වසා දැමීම දැඩි අගුලු දැමීම සහ ජ්‍යාත්‍යන්තර සම්බාධක ද උතුරු කොරියාවේ ආර්ථිකයට දැඩි බලපෑම් එල්ල කරනු ලබන බව සඳහන් වෙනවා.
උතුරු කොරියාව කිසිදු කොවිඩ් සිද්ධියක් වාර්තා නොකළද, එය සිය දේශසීමා මුද්‍රා තබා අගුලු දැමීමට කටයුතු කරනු ලැබුවා.
එම දේශසීමා වසා දැමීම චීනයෙන් කෙරෙන වැදගත් ආනයන වලට බලපා ඇති බවයි පැවසෙන්නේ.
