දැනට විදේශ අමාත්‍යාංශය පවත්වාගෙන යනු ලබන ජනරජ ගොඩනැගිල්ලේ ප්‍රමාණවත් ඉඩකඩ නොමැතිබව පවසමින් විදේශ කටයුතු අමාත්‍යාංශය එම ස්ථානයෙන් ඉවත්කිරීමට රජය කටයුතු කරමින් සිටිනවා.
ඒ අනුව විදේශ අමාත්‍ය ජී.ඇල්.පීරිස් මහතා විසින් කැබිනට් පත්‍රිකාවක් ඉදිරිපත් කරමින් යෝජනා කර ඇත්තේ විදේශ අමාත්‍යාංශය එම ස්ථානයෙන් ඉවත්කර නාගරික සංවර්ධන අධිකාරිය සතු විද්‍යා මාවතේ පිහිටි දැනට කාර්මික තාක්ෂණ ආයතනය විසින් භාවිතා කරන ඉඩමෙහි නව ගොඩනැගිල්ලක් ඉදිකිරීමටයි.
විදේශ අමාත්‍යවරයා සඳහන් කරන්නේ වත්මන් විදේශ අමාත්‍යංශ ගොඩනැගිල්ලේ ප්‍රමාණවත් පහසුකම් නොමැතිවීම නිසාවෙන් එම අමාත්‍යාංශය යටතේ පවතින අංශ කිහිපයක්ම ප්‍රධාන කාර්යාලයෙන් බැහැරව වෙනත් ස්ථානවල පවත්වාගෙන යන බවයි.
ඒ හේතුවෙන් විවිධ පරිපාලනමය ගැටළුවලට මුහුණ පෑමට සිදුව ඇති බැවින් වර්තමාන අවශ්‍යතාවයන්ට ගැලපෙන පරිදි ප්‍රමාණවත් ඉඩකඩ සහිතව නව ගොඩනැගිල්ලක් ඉදිකිරීමේ අවශ්‍යතාවය පැන නැගී ඇති බව එම කැබිනට් පත්‍රිකාවේ සදහන්.
කෙසේ වෙතත් වැඩි වාණිජ වටිනාකමක් සහිත ස්ථානයක පිහිටා ඇති වත්මන් විදේශ අමාත්‍යාංශ ගොඩනැගිල්ලට ඉන්පසුව සිදුවන්නේ කුමක්දැයි මේ වන තෙක් වාර්තා වන්නේ නැහැ.
