‘ගම සමග පිළිසඳර’ වැඩසටහන අද (30) දින ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් කැබිතිගොල්ලෑව, කණුගහවැව ග්‍රාමයෙහි පැවැත්වුණා.
2020 සැප්තැම්බර් 25 වැනි දින මෙම ‘ගම සමග පිළිසඳර’ වැඩසටහන ආරම්භ වූයේ බදුල්ල දිස්ත්‍රිකයේ හල්දුම්මුල්ල ප්‍රාදේශීය ලේකම් කොට්ඨාසයේ වෙලංවිට ගම්මානයෙනි.
මෙතෙක් කල් නිසි අවධානයට ලක් නොවූ නගරයෙන් බැහැර දුෂ්කර ගම්මාන වෙත ගොස් ගැමි ජනතාව මුහුණපා සිටින, දිගු කලක් නොවිසඳී ඇති ගැටළු නිවැරදිව හදුනාගැනීම, එම ගැටළු නිලධාරීන්ට ඝෘජුව ඉදිරිපත් කොට විසඳුම් දීම මෙම වැඩසටහනෙහි අරමුණයි.
වැඩසටහනේ දෙවැන්න 2020 ඔක්තෝබර් 02 වැනිදා මාතලේ දිස්ත්‍රික්කයේ, විල්ගමුව ප්‍රාදේශීය ලේකම් කොට්ඨාශයට අයත් හිඹිලියාකඩ ගම්මානයේ දී ද, තෙවැන්න දෙසැම්බර් 18 වැනි දින බලංගොඩ, ඉඹුල්පේ රාවණාකන්ද ගම්මානයේ දී ද පැවැත්වූවා.
අද (30) පැවති පිළිසඳරේදී තල්ගහවැව, හල්මිල්ලවැටිය, තම්මන්නෑව, හේරත් හල්මිල්ලෑව, නිකවැව ඇතුළු ගම්මාන රැසක ජනතාව සිය දුක්ගැනවිලි ජනාධිපතිතුමාට දැනුම්දීම සඳහා රැස්ව සිට‍ියා.
මෙහිදී රජයේ සහ තමාගේ ප්‍රතිපත්තිය කෘෂිකර්මාන්තයට ප්‍රමුඛතාවයදීම බව සඳහන් කළ ජනාධිපතිතුමා කෘෂිකර්මාන්තය ජීවනෝපාය කරගත් ජනතාවගේ දෛනික වගා කටයුතුවලට බාධා නොකරන ලෙසත් දේශපාලන අධිකාරියේ පූර්ණ සහය ඔවුනට හිමිවිය යුතු බවටත් නිලධාරීන්ට උපදෙස් දී තිබේ.
එමෙන්ම 2012 වසරෙන් පසු Google සිතියමට අනුව රක්ෂිත මායිම් සලකුණු කිරීමේ දී අවශේෂ කැලෑ ලෙස හදුනාගෙන ඇති ස්ථාන වහාම නිවැරදි ලෙස ජනතාවට වගා කටයුතු සඳහා ලබාදීමටද මෙහිදී තීරණය කර ඇත.
කෙසේ වෙතත් වරින් වර ජනාධිපතිවරයා අනුරාධපුරයට යෑම පිළිබදව විවිධ පාර්ශවයන්ගේ විවේචනයට ලක්වුණා.
ඒ අතර ආණ්ඩුවට හිතවත් භික්ෂූන්වහන්සේලාද වීම විශේෂත්වයක්.
