ගෝඨාභය රාජපක්ෂ මහතාට විශ්‍රාමික ජනාධිපතිවරයකු ලෙස රුපියල් දහතුන් ලක්ෂ විසි නව දහස් තුන්සිය අසූ හතක මුදලක් රජයෙන් මාසිකව වැය කරන බව ජනාධිපති ලේකම් කාර්යාලය පවසනවා.
ජනාධිපති කාර්යාලය මේ තොරතුරු සඳහන් කර ඇත්තේ ශ්‍රීලංකා පුවත්පත් ආයතනය තොරතුරු දැනගැනීමේ පනත යටතේ කළ විමසුමකදීයි.
හිටපු ජනපති ගෝඨාභය රාජපක්ෂ මහතාට රජයෙන් වැය කරන වියදම් සම්බන්ධයෙන් සමාජ මාධ්‍ය ඇතුළු මාධ්‍ය වල විවිධ තොරතුරු පසුගිය කාලයේ පළවී තිබුණා.
ඒ අනුව ජනාධිපති කාර්යාලයේ තොරතුරු නිලධාරී ජනාධිපති ජේෂ්ඨ සහකාර ලේකම් එස්.කේ හේනාධීර මහතා විසින් අදාල ලිපිය යොමු කර තිබෙනවා.
මෙහිදී ජනපති ගෝඨාභය රාජපක්ෂ මහතාගේ දෙසැම්බර් මසට අදාළ වියදම් ලෙස විශ්‍රාම වැටුප,ඉන්ධන දීමනාව සහ ලේකම් දීමනාව සඳහා රුපියල් 9,91,000ක් ද දුරකථන ,විදුලිය ,ජලය සහ අනෙකුත් වියදම් සඳහා රුපියල් 3,38,387.60ක් බවයි සඳහන් වන්නේ.
ගෝඨාභය රාජපක්ෂ මහතා මේවන විට පරිහරණය කරන වාහනවල තොරතුරු ද ඉල්ලා තිබූ නමුත් එම තොරතුරු අදාළ අංශයන් ඉල්ලා තිබෙන අතර ඒවා ලැබුණු පසු ලබා දෙන බව ජනාධිපති ලේකම් කාර්යාලය පවසනවා.
විශ්‍රාමික ජනපතිවරුන්ගේ අනෙකුත් වියදම් ඇතුළත් වන වියදම් වාර්තා වේ. මෙම වියදම් එකම වැය විෂයක් යටතේ සටහන් වන බැවින් විශ්‍රාම වැටුප,ඉන්ධන දීමනාව,දුරකතන,විදුලිය ,ජලය හා වෙනත් දීමනා වෙන් වෙන් ලෙස දිය නොහැකි බවයි එම ලිපියේ සඳහන් වන්නේ
