අධිකරණයට අපහාස කිරීමේ චෝදනාවකට වැරදිකරු වී සිවු වසරක සිරදඬුවමක් ගෙවමින් සිටින හිටපු පාර්ලිමේන්තු මන්ත්රී රන්ජන් රාමනායක වෙනුවෙන් එක්සත් ජාතීන්ගේ මානව හිමිකම් කවුන්සිලය ඉදිරියේ කරුණු දැක්වීම සඳහා සමගි ජන බලවේගයේ පාර්ලිමේන්තු මන්ත්රීවරුන් වන හරින් ප්රනාන්දු සහ මනුෂ නානායක්කාර ඊයේ (28) ස්විට්සර්ලන්තයේ ජිනීවා නුවර වෙත පිටත්ව ගොස් තිබෙනවා.
එහිදී රන්ජන් රාමනායක මහතා අධිකරණයට අපහාස කළේ යැයි වන සිදුවීම හා ඒ සම්බන්ධයෙන් වූ නීතිමය ක්රියාමාර්ග මෙන්ම ඔහුට නිදහස ඉල්ලා සිදුකරන ලද ඉල්ලීම් සම්බන්ධයෙන්ද මානව හිමිකම් කවුන්සලය දැනුවත් කරනු ඇති.
2021 ජනවාරි 11 වන දා ආණ්ඩුක්රම ව්යවස්ථාවේ 105 (3) වගන්තිය ප්රකාරව ශ්රේෂ්ඨාධිකරණය විසින් රාමනායකට එම සිරදඬුවම පනවනු ලැබූවා.
මීට අදාළ සිදුවීම වන්නේ එවකට අගමැති රනිල් වික්රමසිංහ සමග අරලියගහ මන්දිරයේදී සාකච්ඡාවක් පැවැත්වීමෙන් අනතුරුව 2017 අගෝස්තු 21 වන දා රාමනායක මාධ්ය ඉදිරියේ කියා සිටියේ, “ලංකාවේ බහුතරයක් ඉන්නේ ‘කරප්ටඩ්’(දූෂිත) විනිසුරුවරු, කරප්ටඩ් ලෝයර්ස්ලා, සියයට 95ක් විතර වගේ ඔවුන් සල්ලිවලට වැඩ කරන්නේ. ඔවුන් හැමදාම මිනීමරුවන්ව, දූෂිතයන්ව, කුඩුකාරයන්ව ආරක්ෂා කළා සල්ලිවලට.” යන ප්රකාශයයි.
රන්ජන් රාමනායක මහතාගේ මෙම ප්රකාශය අධිකරණයට අපහාස කිරීමක් යැයි සදහන් කරමින් රණවක සුනිල් පෙරේරා නමැති පුද්ගලයා 2017 අගෝස්තු 21 ශ්රේෂ්ඨාධිකරණ හමුවේ නඩුවක් ගොනු කළා.