විදෙස්ගත ශ්‍රී ලාංකික ඩයස්පෝරාව හමුවී සාකච්ඡා කර ශ්‍රී ලංකාවට ඩොලර් රැගෙන ඒමට තමන් සුදානම් බව සමගිජන බලවේගයේ පාර්ලිමේන්තු මන්ත්‍රී මනෝ ගනේෂන් පවසනවා.
ඒ, ඊයේ (15) පැවති ප්‍රවෘත්ති සාකච්ඡාවකට එක්වෙමින්.
රට තුළ තහනම් කර තිබු ජාත්‍යාන්තර දෙමළ සංවිධාන 06ක් සහ පුද්ගලයින් පිරිසකගේ තහනම ඉවත් කිරීමට රජය ගත් පියවර සුබදායක බවයි ඔහු පවසන්නේ.
වැඩිදුරටත් අදහස් දැක්වු පාර්ලිමේන්තු මන්ත්‍රී මනෝ ගනේෂන්,
“මේවා ඉවත්වීම හරහා ලෝකෙට ලංකාව ගැන හොඳ පණිවුඩයක් ලබාදීලා තිබෙනවා. ඒ පණිවුඩය සුබවාදී පණිවිඩයක් කියලා මම කියනවා. මේ පණිවුඩය අරන් ගිහින් උතුරු අමෙරිකාවට, යුරෝපයට, ඔස්ට්‍රේලියාවට මම ගිහිල්ලා ලංකාව වෙනුවෙන් කතා කරන්න ලෑස්තියි. මට ඒක පුළුවන්. මම දමිළ ශ්‍රී ලංකිකයෙක්, නමුත් උතුරු – නැගෙනහිර නෙවෙයි. සිංහල ජනතාව එක්ක ඉන්න කොළඹ මන්ත්‍රී. මම දෙමළ, මුස්ලිම්, සිංහල සියල්ල දන්නවා. මේ ආණ්ඩුවේ මට ඇමතිකම් එපා මම ඒකට සුදානම් නෑ. නමුත් රට වෙනුවෙන් වැඩ කරන්න ලෑස්තියි මම. ඒ නිසා මම ඉල්ලීමක් කරනවා ජනපති රනිල් වික්‍රමසිංහ මහතාගෙන්, සලකා බලන්න මේ ඩයස්පෝරා ආයතන කවුරුත් දැන් වෙනම රටක් ඉල්ලන්නේ නැහැ. මට වගකීම භාරගන්න පුළුවන්. මට පුළුවන් මේ ආයතනයට කතා කරලා වෙනසක් ගේන්න. හැබැයි යනකොට මට හිස් අතින් යන්න බෑ. ආණ්ඩුවෙන් මට ඕනේ සැලැස්මක්.”
