ශ්රී ලංකාව සහ ඇෆ්ගනිස්ථානය අතර පැවති තෙවැනි 20යි 20 තරගය ලකුණු 03කින් ජය ගැනීමට ඇෆ්ගනිස්ථාන කණ්ඩායම ඊයේ (21) සමත් වුණා.
මෙම තරගයේ අවසන් පන්දු වාරයේදී කමිඳු මෙන්ඩිස් මුහුණ දුන් පන්දුව සම්බන්ධයෙන් තරග විනිසුරුවරයා විසින් ලබාදුන් තීන්දුව පිළිබඳ ශ්රී ලංකා කණ්ඩායමේ නායක වනිදු හසරංග පවසා සිටියේ අන්තර්ජාතික තරගයක දී මෙවැනි විනිසුරු තීරණයන් බලාපොරොත්තු විය නොහැකි බවයි.
තව මඳක් පන්දුව ඉහළ ගියේ නම්, පන්දුව පිතිකරුගේ හිසේ වදින බවත් එවැනි දෙයක් නොපෙනේ නම් එම විනිසුරුවරයා අන්තර්ජාතික විනිසුරු මට්ටමට නොගැළපෙන බව තරගය අවසානයේ පැවති මාධ්ය හමුවේදී අදහස් පළ කරමින් නායක වනිදු හසරංග පවසා සිටියා.
එබැවින් එම විනිසුරුවරයා වෙනත් රැකියාවක් තෝරාගැනීම සුදුසු බවයි ඔහු මෙහිදී සඳහන් කර සිටියා.
නායක වනිදු හසරංග තවදුරටත් අදහස් දක්වමින් කියා සිටියේ මෙවැනි නිපන්දු පිළිබඳ ඇති වන ගැටලු සඳහාද විනිසුරු තීරණ පිළිබඳ තෙවැනි විනිසුරුට යොමු කිරීම හෙවත් රිවීව් අවස්ථාව ඇති කළ යුතු බවත් අවශ්ය නම් පිටියේ විනිසුරුට එය තෙවැනි විනිසුරු සඳහා යොමු කිරීමට හැකියාව පැවති බවයි.
කෙසේ වෙතත් දෙරට අතර පැවති 20යි 20 තරගාවලිය දෙකට එකක් ලෙස ජය ගනු ලැබුවේ ශ්රී ලංකා කණ්ඩායමයි.
ඊයේ තරගයේ ප්රථමයෙන් පන්දුවට පහරදුන් ඇෆ්ගනිස්ථාන කණ්ඩායම නියමිත පන්දුවාර 20 අවසානයේ කඩුලු 05ක් දැවී ලකුණු 209ක් ලබාගත්තා.
පිළිතුරු ඉනිම සඳහා පිටියට පිවිසි ශ්රී ලංකා කණ්ඩායම නියමිත පන්දුවාර 20 අවසානයේ කඩුලු 06ක් දැවී ලබා ගැනිමට හැකිවුයේ ලකුණු 206ක් පමණයි.
ශ්රි ලංකා ඉනිම වෙනුවෙන් පැතුම් නිස්සංක ලකුණු 60ක් සහ කමිඳු මෙන්ඩිස් නොදැවී ලකුණු 65ක් ලබා ගැනීමට සමත් වුණා.