ඉන්දියාවේ දේශීයව නිපදවන ලද පළමු ගුවන් යානා ප්‍රවාහන නෞකාව වන INS Vikrant (වික්‍රන්ට්) සැප්තැම්බර් 2 වනදා අගමැති නරේන්ද්‍ර මෝදි ඉදිරියේ සේවා ආරම්භ කිරීමට නියමිත බව වාර්තාවේ.
මෙම නෞකාව, මෙගාවොට් 88 ක බලයක් නිපදවන අතර 1,700ක පමණ කාර්ය මණ්ඩලයක් සඳහා නිර්මාණය කර ඇති මැදිරි 2,300කින් සමන්විත වේ.
ඉන්දියාවේ දේශියව නිපදවන ලද ප්‍රථම ගුවන් යානා ප්‍රවාහන නෞකාව වන වික්‍රන්ට් දියත් කිරීම ඉන්දීය සාගරයේ සහ ඉන්දු පැසිෆික් කලාපයේ සාමය, ආරක්ෂාව සහ ස්ථාවරත්වය ඉහළ නංවනු ඇති බව නාවික හමුදා උප ප්‍රධානී වයිස් අද්මිරාල් එස්.එන්. ගොමේඩ් පැවසීය.
වික්‍රන්ට් යනු ඉන්දියාවේ මෙතෙක් නිපදවා ඇති විශාලතම යුධ නෞකාව වන අතර ඉන්දියානු නාවික හමුදාව සඳහා දේශීයව නිර්මාණය කර නිපදවන ලද පළමු ගුවන් යානා ප්‍රවාහන නෞකාව ද වේ.
මෙම නෞකාව සති තුනකට පෙර සිය සිව්වන සහ අවසාන අදියරේ මුහුදු අත්හදා බැලීම් සාර්ථකව නිම කර තිබුණි.
ගුවන් යානා ප්‍රවාහන නෞකාවක් යනු ඕනෑම ජාතියක් සඳහා වඩාත් ප්‍රබල සමුද්‍ර වත්කම්වලින් එකක් බව ඉන්දීය නාවික හමුදාව පවසයි.
නාවික සැලසුම් අධ්‍යක්ෂක මණ්ඩලය විසින් නිර්මාණය කරන ලද සහ Cochin Shipyard Limited (CSL) විසින් ඉදිකරන ලද INS Vikrant, ටොන් 42,800 ක විස්ථාපනයක් සහිතව, සාමාන්‍ය විදුලි එන්ජින් හතරකින් බල ගැන්වෙන අතර හෙලිකොප්ටර්, ප්‍රහාරක සහ UAV යානා 30 ක් එහි රැගෙන යා හැකිය.
