තලවතුගොඩ මංසන්ධියට ආසන්නයේ ඇති කිඹුලාවල STREET FOOD ජංගම වෙළෙඳසැල් වහාම එම ස්ථානයෙන් ඉවත්කරගන්නා ලෙසට මාර්ග සංවර්ධන අධිකාරිය විසින් දැනුම් දී තිබෙනවා.
ඒ අනුව එළැඹෙන පෙබරවාරි 24 වැනිදා වනවිට මේ ජංගම වෙළෙඳසැල් සියල්ල එම ස්ථානයෙන් ඉවත් කරගත යුතු වනවා.
මෙම ස්ථානයේ ආහාරපාන ඇතුළු විවිධ දෑ අලෙවිකරන වෙළෙඳසැල් 33ක් පමණ තිබෙන අතර එයින් පවුල් 500 ක් පමණ සියජීවනෝපාය සවිකරගන්නවා.
සතියේ දිනවල මෙන්ම සති අන්තයේද සවස් යාමයේ සිට මධ්‍යම රාත්‍රිය දක්වා මෙම වෙළෙඳසැල් විවෘතව පවතින අතර එම ස්ථානයට විශාල පිරිසක් ආහාරවල රසබැලීම සඳහා පැමිණෙනවා.
අප කළ සොයාබැලීමේදී වාර්තාවූයේ අමාත්‍ය බන්දුල ගුණවර්ධන මහතා එම ස්ථානයෙන් ගමන්ගන්නා අවස්ථාවකදී මාර්ගයේ දැඩි රථවාහන තදබදයක් පැවතීම හේතුවෙන් තදබදයට හේතුවූ මෙම STREET FOOD අවන්හල් එම ස්ථානයෙන් ඉවත්කිරීමට කටයුතු කරන බවයි.
වෙළෙඳුන් පවසන්නේ නාගරික සංවර්ධන අධිකාරිය විසින් මීට සති කිහිපයකට පෙර පැමිණ එම ස්ථානයේ කඩ පවතින භූමියෙහි මැනීම් කටයුතු කර එය විධිමත් කිරීමටද කටයුතු කරන බවට සාකච්ඡා කළ බවයි.
එවැනි තත්ත්වයකදී හදිසියේ මෙවැනි තීරණයක් ගැනීම හේතුවෙන් විදේශිකයන්ගේ පවා අවධානයට යොමුව ඇති මෙම ස්ථානය වසාදැමීම ඔවුන්ගේ ආර්ථිකයට මෙන්ම මෙරට ආර්ථිකයටද සිදුකරන හානියක් බව වෙළෙදුන් පෙන්වා දෙනවා.
