පෙරේදා (29) සිට මහර බන්ධනාගාර රැදවියන් අතර පවත්නා නොසන්සුන්තාවය මැඩපැවැත්වීම සදහා අද බන්ධනාගාරය තුළ විශේෂ මෙහෙයුමක් දියත් කෙරුණා.
ආරක්ෂක අමාත්‍යාංශයේ ලේකම් විශ්‍රාමික මේජර් ජෙනරාල් කමල් ගුණරත්න මහතාගේ උපදෙස් පරිදි අදාල මෙහෙයුම පොලිස්පති C.D.වික්‍රමරත්න මහතා විසින් මෙහෙයවා තිබෙනවා.
ඒ අනුව බන්ධනාගාර නිලධාරීන් සමග පොලීසිය, විශේෂ කාර්ය බලකාය එක්ව සිදුකල ඒකාබද්ධ මෙහෙයුමකින් අනතුරුව අද දිනයේත් නොසන්සුන්ව සිටි බන්ධනාගාර රැදවියන් පිරිස පාලනය කර තිබෙනවා.
අනතුරුව අද මධ්‍යහ්නයේ ඔවුන්ව බන්ධනාගාර බලධාරීන් වෙත භාර දුන් බව හමුදා මාධ්‍ය ප්‍රකාශකවරයා පැවසුවා.
මෙම මෙහෙයුම සදහා ආසන්න වශයෙන් ආරක්ෂක අංශ නිලධාරීන් 600 ක් පමණ සහභාගීවී සිට ඇති අතර ඔවුන් කොවිඩ් 19 වලින් වැළකීම සඳහා භාවිතා කරන PPE KIT වලින් සැරසී සිට තිබෙනවා.
මෙහෙයුම අතරතුර පිරිස මර්දනය කිරීම සදහා කදුළු ගෑස්ද භාවිතා කර ඇති බවයි වාර්තා වන්නේ.
මෙහෙයුම පැවැත්වෙන අතරතුර හෙලිකොප්ටර් යානයක් කිහිප වතාවක් මහර බන්ධනාගාරය ඉහළ අහසේ සැරිසරමින් අභ්‍යන්තර තත්ත්වය නිරීක්ෂණය කිරීමක්ද සිදුකළා.
තොරතුරු වාර්තාවන ආකාරයට අද රාත්‍රියේත් තවත් රැදවියන් පිරිසක් මහර බන්ධනාගාරයෙන් රැගෙන යාමට නියමතයි.
මහර බන්ධනාගාර ගැටුමෙන් මේ වන විට රැදවියන් 11 දෙනෙක් මියගොස් 117 දෙනෙකු තුවාල ලැබුවා.
තුවාල ලැබූවන් අතරින් 105 දෙනෙක් රැදවියන් වනවා.
පහරකෑමට ලක්වූ බන්ධනාගාර නිලධාරීන් දෙදෙනෙකු අසාධ්‍ය තත්ත්වයෙන් රාගම රෝහලේ ප්‍රතිකාර ලබනවා.
