ජනාධිපතිවරයාට විරෝධය පලකරමින් පාර්ලිමේන්තුව අසළ අද (05) පැවති විරෝධතාවයට පැමිණි යතුරුපැදි කිහිපයක් නිසා එම ස්ථානයේ උණුසුම් තත්ත්වයක් ඇතිවුණා.
ඒ සාමකාමී විරෝධතාවයක් පැවති ස්ථානයට ගිනිඅවි රැගෙන මෙම පිරිස පැමිණ තිබීම හේතුවෙන්.
මීට අමතරව ඔවුන් පැමිණි යතුරුපැදිවලට අංක තහඩු නොතිබීම නිසා විරෝධතාකරුවන් ප්‍රකෝපවූවා.
මෙම පුද්ගලයන් හට පොලීසියද විරෝධය පලකර අතර ඔවුන් එම ස්ථානයෙන් එළවා දැමීමට පොලීසිය කටයුතු කළා.
කෙසේවෙතත් යුද හමුදාව තහවුරු කරන්නේ එම ස්ථානයට පැමිණි යතුරු පැදි 4 ශ්‍රී ලංකා යුද්ධ හමුදා යතුරු පැදි කණ්ඩායමට අයත් යතුරු පැදි හතරක් බවයි.
අදාළ යතුරු පැදි 4 පාර්ලිමේන්තු සංකීර්ණය අසල යොදවා තිබු මාර්ග බාධකය අසලට පැමිණි අවස්ථාවේදී එම මාර්ග බාධකයෙහි රාජකාරි නියුතු පොලිස් නිලධාරින් දෙදෙනෙකු විසින් ඔවුන්ට නොමනා ලෙස හැසිරී කටයුතු කිරීම සම්බන්ධයෙන් කඩිනමින් විමර්ශනයක් සිදුකොට විනයානුකූලව කටයුතු කරන ලෙස යුද හමුදාපතිවරයා පොලිස්පතිවරයාගෙන් ඉල්ලා සිටිනවා.
