මුහුණු ආවරණ නොමැතිව ඉන්ධන පිරවුම්හල් වෙත පැමිණෙන පුද්ගලයින්ට අද (01) සිට ඉන්ධන නිකුත් නොකරන බව ඛනිජ තෙල් අලෙවි නියෝජිතයින්ගේ සංගමය පවසනවා.
COVID-19 අවදානම රට තුළ යළිත් ඉහළ යමින් පවතින බැවින් මේ පිළිබඳව සියලුම ඉන්ධන පිරවුම්හල් දැනුවත් කර ඇති බවයි එහි සම ලේකම් කපිල නාඔටුන්න පවසන්නේ.
මුහුණු ආවරණ පැළඳ නොසිටින අයට ඉන්ධන ලබා නොදෙන ලෙස විස්තර කරමින් සෑම පිරවුම්හලකම අදාළ දැන්වීම් ප්රදර්ශනය කරන බවත් ඔහු පවසනවා.
මේ අතර, අද සිට කිව් ආර් කේතයේ සඳහන් අංකය සහ වාහන අංක තහඩුවේ සඳහන් අංකය පරීක්ෂාවට ලක් කිරීමෙන් පමණක් ඉන්ධන නිකුත් කරන ලෙස විෂයභාර අමාත්ය කංචන විජේසේකර සියලු පිරවුම්හල් හිමියන්ගෙන් සහ කළමනාකාරීත්වයෙන් ඉල්ලීමක් කර තිබුණා.
එමෙන්ම තමන්ගේ රථය සඳහා වෙන්වන ඉන්ධන කෝටාව ලබාගැනීමට සතියක කාලයක් පවතින බැවින් අද දිනයේම පිරවුම්හල් වෙත පැමිණ එය ලබාගැනීමට උත්සාහ නොකරන ලෙස බලශක්ති අමාත්යාංශය ජනතාවගෙන් ඉල්ලීමක් කළා.