සභාව කල් කල්තබන අවස්ථාවේ විවාදය පැවැත්වෙමින් තිබියදී සභාවේ ගණපූරණය නොමැතිවීම හේතුවෙන් මුලසුනේ සිටි සුරේන් රාඝවන් මන්ත්‍රීවරයා විසින් ඊයේ දින පාර්ලිමේන්තුව අද උදෑසන 10.00 දක්වා කල් තබනු ලැබීය.
ඒ හේතුවෙන් පස්වරු 5.30 ට පමණ පාර්ලිමේන්තුවේ කටයුතු හදිසියේම අත්හිටුවිණි.
පාර්ලිමේන්තුවේ ඝන පූර්ණය නොමැති බව මුලසුනට දැනුම් දීම සිදුකරනු ලැබුවේ සභාව කල්තබන අවස්ථාවේ යෝජනාව ඉදිරිපත් කළ සමගි ජන බලවේගයේ අනුරාධපුර දිස්ත්‍රික් මන්ත්‍රී රෝහණ බණ්ඩාර මහතා විසිනි.
තමාගේම කණ්ඩායමේ යෝජනාවක් විවාදයට ගැනෙමින් තිබෙන අවස්ථාවක එම කණ්ඩායමේම මන්ත්‍රීවරයකු ගණපූරණය පිළිබඳ ප්‍රශ්නය මතු කිරීම ඉතිහාසයේ පළමු වතාවට සිදු වූ සිද්ධියක් බවයි පැවසෙන්නේ.
ඒ අනුව මුලසුනේ සිටි මන්ත්‍රීවරයාගේ දැනුම් දීමට අනුව ‘මන්ත්‍රීවරුන් කැඳවීමේ සීනුව’ නාද කෙරුණු නමුත් ගණපූරණය සම්පූර්ණ වීමට ප්‍රමාණවත් මන්ත්‍රීවරුන් පිරිසක් සභා ගැබේ රැඳී නොසිටීම හේතුවෙන් මුලසුනේ සිටි මන්ත්‍රීවරයා විසින් පාර්ලිමේන්තුව කල් තබනු ලැබීය.
පාර්ලිමේන්තුවේ අවසන් වරට රැඳී සිටියේ ආණ්ඩු පක්ෂයේ මන්ත්‍රීවරුන් හත් දෙනෙකු සහ විපක්ෂයේ එක් මන්ත්‍රීවරයකු පමණි.
