දරුණු ගංවතුර තත්ත්වය හේතුවෙන් රටේ ආහාර අර්බුදයක් ඇතිවී තිබෙන බව පාකිස්ථාන අගමැති ෂබාස් ෂරිෆ් ප්රකාශ කර සිටිනවා.
තුර්කි ජනාධිපති රිසෙප් තායිප් අර්ඩගොන් සමග පැවති දුරකථන සංවාදයකදී පාකිස්ථාන අගමැතිවරයා මේ බව සඳහන් කර ඇති බවයි විදෙස් මාධ්ය වාර්තා කර සිටියේ.
මේ අතර පීඩාවට පත්ව සිටින සිය රට වෙනුවෙන් තුර්කිය විසින් ප්රදානය කරනු ලැබූ ආහාර හා ඖෂධ පිරවූ ගුවන් යානා 12ක් මෙන්ම දුම්රිය 04ක් වෙනුවෙන් ද පාකිස්ථාන අගමැතිවරයා මෙහිදී සිය ස්තුතිය පුදකර තිබෙනවා.
මේ අතර පාකිස්ථාන අගමැතිවරයා විසින් ගංවතුරෙන් හානියට පත්වූ ප්රදේශ නැවත ගොඩ නැගීමට ද තුර්කියෙන් උපකාර ඉල්ලා ඇති බව සඳහන්.
ගංවතුරෙන් නිවාස හානියට පත්වූ පකිස්තානයේ ලක්ෂ 06 කට අධික ජනතාවක් මේ වන විට සරණාගත කඳවුරු තුල මෙන්ම තාවකාලික රැදවුම් මධ්යස්ථානවල ලැඟුම් ගෙන සිටිනවා.
ඔවුන්ට අවශ්ය ආහාර පාන සැපයීම සඳහා පාකිස්ථාන හමුදාව, එක්සත් ජාතීන්ගේ සංවිධානය, රාජ්ය නොවන සංවිධාන පියවර ගනිමින් සිටින බවයි වාර්තා වන්නේ.