දෙවන ඉන්දියා-ඕස්ට්‍රේලියා සමුළුව අතරතුර අග්‍රාමාත්‍ය නරේන්ද්‍ර මෝදි සහ ඕස්ට්‍රේලියානු අගමැති ස්කොට් මොරිසන් පුළුල් ආර්ථික සහයෝගීතාවයක් සදහා වන එකගතා රැසකට පැමිණ ඇති බව වාර්තා වේ.
ඒ අනුව ඉන්දියා ඕස්ට්‍රේලියානු ද්විත්ව බදු වැළැක්වීමේ ගිවිසුම යටතේ බදු පැනවීමේ ප්‍රශ්නය ඉක්මනින් විසඳීමේ වැදගත්කම නායකයින් මෙහිදී අවධාරණය කළ බව සාකච්ජාවලින් පසුව නිකුත් කෙරුණු ඒකාබද්ධ නිවේදනයක සඳහන් වේ.
නායකයන් දෙදෙනාම නිදහස්, සාධාරණ සහ නීති මත පදනම් වූ වෙළඳ පරිසරයක් නිර්මාණය කිරීමේ වැදගත්කමක සම්බන්ධයෙන් ද එකගතා රැසකට පැමිණ තිබේ.
ලෝක වෙළඳ සංවිධානය සමඟ බහුපාර්ශ්වික වෙළඳ පද්ධතිය ආරක්ෂා කිරීමට සහ ශක්තිමත් කිරීමට දෙරටේ කැපවීම ද මෙහිදී තහවුරු කර ඇති අතර ජුනි මාසයේදී පැවැත්වීමට නියමිත 12 වන අමාත්‍ය සමුළුවේ දී මේ පිළිබද තවදුරටත් සාකච්ඡා කිරීමට ද එකග වී ඇත.
සැපයුම් දාමයන් ගොඩනැගීමට, ශක්තිමත් කිරීමට සහ විවිධාංගීකරණය කිරීමට මෙන්ම සැපයුම් දාම කඩාකප්පල් කිරීම් වළක්වා ගැනීමට එක්ව ක්‍රියා කිරීමේ වැදගත්කම ද නායකයෝ මෙහිදී අවධාරණය කළහ.
ඕස්ට්රේලියාව සහ ඉන්දියාව වැදගත් වෙළඳ හවුල්කරුවන් වන අතර ඉන්දියාවෙන් ඕස්ට්‍රේලියාවට ප්‍රධාන වශයෙන් ඛනිජ තෙල් නිෂ්පාදන, ඖෂධ, ඔප දැමූ දියමන්ති, රන් ආභරණ සහ ඇඟලුම් යනාදිය අපනයනය කරනු ලබයි.
