දේශගුණික මූල්‍යකරණයේ නව මුල පිරීම් පිළිබඳ සහ ද්විපාර්ශ්වික සබඳතා සමාලෝචනය වෙනුවෙන් ඉන්දීය අග්‍රාමාත්‍ය නරේන්ද්‍ර මෝදි , නෝර්වේ අගමැති ජොනස් ගාර් ස්ටෝර් දුරකථන සංවාදයක් පවත්වා තිබේ.
ට්විටර් පණිවුඩයක් නිකුත් කරමින් අගමැති මෝදි පැවසූයේ නෝර්වේ අගමැති ජොනස් ගාර් ස්ටෝර් සමඟ දුරකථනයෙන් ඵලදායී සංවාදයක් පැවැත්වූ බවයි.
සංවර්ධනය වෙමින් පවතින රටවල පුනර්ජනනීය බලශක්ති ව්‍යාපෘති සඳහා දේශගුණික මූල්‍ය බලමුලු ගැන්වීමේ මුලපිරීම් ඇතුළුව අන්‍යෝන්‍ය උනන්දුවක් දක්වන ද්විපාර්ශ්වික සහ ජාත්‍යන්තර කරුණු පිළිබඳව නායකයින් දෙදෙනා මෙහිදී සාකච්ඡා කර තිබේ.
සංවර්ධනය වෙමින් පවතින ලෝකය සඳහා සාධාරණ, කාලෝචිත සහ ප්‍රමාණවත් දේශගුණික මූල්‍ය පහසුකම් සහතික කිරීමේ වැදගත්කම අගමැති මෝදි අවධාරණය කළ බව විදේශ කටයුතු අමාත්‍යාංශයේ මාධ්‍ය නිවේදනය සඳහන් වේ.
හරිත හයිඩ්‍රජන්, විද්‍යාව සහ තාක්‍ෂණය සහ අධ්‍යාපනය වැනි ක්ෂේත්‍රවල වැඩිවන ඉන්දියා-නෝර්වේ සහයෝගීතාව පිළිබඳවද ඔවුන් තෘප්තිමත් වූ බව ද පැවසේ.
අග්‍රාමාත්‍ය නරේන්ද්‍ර මෝදි, නෝර්වේ අග්‍රාමාත්‍ය ධුරය භාර ගැනීම පිළිබඳව ජොනස් ගාර් ස්ටෝර්ට සුබ පැතුම් එක් කළ අතර ඉන්දියා-නෝර්වේ සබඳතා තවදුරටත් ශක්තිමත් කිරීම සඳහා නව පරිපාලනය සමඟ සමීපව කටයුතු කිරීමට බලාපොරොත්තු වන බව ද පවසා තිබේ.
