මාධ්‍යවේදී තරිඳු ජයවර්ධන යනු ආණ්ඩු පක්ෂ සහ විපක්ෂ භේදයකින් තොරව සියල්ලන් විවේචනය කරන ස්වාධීන මාධ්‍යවේදියෙකු බවත් බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්ධු තෙන්නකෝන් විසින් එම මාධ්‍යවේදියාට සිදුකර ඇති තර්ජනය හෙළා දකින බවත් පාර්ලිමේන්තු මන්ත්‍රී මනූෂ නානායක්කාර මහතා පවසනවා.
අද (06) දින පාර්ලිමේන්තුවේදී විශේෂ ප්‍රකාශයක් සිදුකරමින් ඒ මහතා පෙන්වා දුන්නේ මේ සම්බන්ධයෙන් පොලිස්පතිවරයාට පැමිණිල්ලක් සිදුකර ඇති නමුත් ඒ සම්බන්ධයෙන් විමර්ශනයක් සිදුවන්නේද යන්න අපැහැදිළි බවයි.
මේ වන විට මෙරට ජනපති ජනමාධ්‍ය නිදහසේ සතුරෙක් බවට පත්ව ඇති බවත් RSF – 2021 ලැයිස්තුවට ඇතුලත්ව ඇති ලෝක නායකයන් 37 දෙදෙනා අතර ගෝටාභය රාජපක්ෂද සිටින බවත් ඒ මහතා පෙන්වා දෙනවා.
එමෙන්ම පොලිස් අත් අඩංගුවේ පසුවෙන පුද්ගලයන්ට වධහිංසා පැමිණවීම හා අමානුෂික ලෙස සැලකීම වැළැක්වීමට ‘පොලිසිය කණපිට ගසා’ හෝ කටයුතු කරන බවට විෂය භාට අමාත්‍යවරයා වන සරත් වීරසේකර අමාත්‍යවරයා ප්‍රකාශ කර තිබුණද ඔහු ඒ සම්බන්ධයෙන් අසමත් වී ඇති බවත් මනූෂ නානයක්කාර මහතා පවසනවා.
කාබන් විමෝචනය කරන රථ වාහන අවම කිරීමටත් විදුලි රථවාහන භාවිතය ප්‍රවර්ධනය කරන බවත් ප්‍රකාශ කළ රජයක් විසින් පෝලිසියට ත්‍රීරෝද රථ 2000ක් ලබා ගත්තේ මන්ද යන්න ගැටළුවක් බවයි ඒ මහතා වැඩිදුරටත් පවසන්නේ.
