හිටපු ජනාධිපතිනි චන්ද්‍රිකා බණ්ඩාරනායක කුමාරණතුංග මහත්මියගේ ප්‍රධානත්වයෙන් නිදහස් පක්ෂයේ ජ්‍යේෂ්ඨයින් පිරිසක් එක්ව අද (08) දිනයේ පැවැත්වූ දේශපාලන මණ්ඩල රැස්වීම නීති විරෝධී බව ශ්‍රී ලංකා නිදහස් පක්ෂයේ වැඩ බලන මහ ලේකම් පාර්ලිමේන්තු මන්ත්‍රී සාර්ථී දුශ්මන්ත මිත්‍රපාල මහතා පවසනවා.
නිවේදනයක් නිකුත් කරමින් සාර්ථී දුශ්මන්ත මහත පෙන්වා දෙන්නේ අමාත්‍ය නිමල් සිරිපාල ද සිල්වා මහතා විසින් මෙම රැස්වීම කැඳවා තිබූ බවයි.
ශ්‍රී ලංකා නිදහස් පක්ෂ ව්‍යවස්ථාවට අනුව දේශපාලන මණ්ඩලය කැඳවීමේ බලය හිමි වන්නේ පක්ෂයේ සභාපතිවරයා වන හිටපු ජනාධිපති මෛත්‍රීපාල සිරිසේන මහතාට වන අතර ඔහුට එරෙහිව දිසා අධිකරණයෙන් ලබාදී ඇති වාරණ නියෝගයට අනුව දැනට පක්ෂයේ සභාපතිවරයකු නොමැති බව මෙම නිවේදනයේ සඳහන්.
මෙම තත්වයට හමුවේ පක්ෂයේ වැඩබලන සභාපතිවරයා ලෙස කවුරුන් හෝ පත්කිරීමට එම තීරණය අධිකරණ තීන්දුවකට අනුව සිදු කළ යුතු බව දුශ්මන්ත මිත්‍රපාල මහතා තවදුරටත් පෙන්වා දෙනවා.
එමෙන්ම, අද දිනයේ පැවති දේශපාලන මණ්ඩල රැස්වීමට පැමිණ සිටි හිටපු ජනාධිපතිනි චන්ද්‍රිකා බණ්ඩාරනායක කුමාරණතුංග ඇතුළු බොහෝ දෙනෙකු ශ්‍රී ලංකා නිදහස් පක්ෂයේ සාමාජිකයින් බවද මෙම නිවේදනයේ සඳහන්.
නිදහස් පක්ෂයේ වැඩ බලන මහ ලේකම්වරයා තවදුරටත් පෙන්වා දෙන්නේ ඒ අනුව මෙම නීති විරෝධී ක්‍රියාවට එරෙහිව නීතිමය ක්‍රියාමාර්ග ගන්නා අතරම ශ්‍රී ලංකා නිදහස් පක්ෂය, නීතිමය රාමුවට අනුකූලව අදාළ අධිකරණ නියෝග අනුව කටයුතු කරනු ඇති බවයි.
