රටේ ප්‍රධාන ගැටලු කිහිපයකට ඉදිරි දිනවලදි විසඳුම් ලැබෙනු ඇති බව මුදල් අමාත්‍ය බැසිල් රාජපක්ෂ මහතා පවසනවා.
ඒ, බණ්ඩාරගම ප්‍රදේශයේ වෛද්‍ය උපකරණ නිපදවීම සඳහා මෙරට ස්ථාපිත කරන ලද පළමු කර්මාන්ත ශාලාව විවෘත කිරීමේ අවස්ථාවට එක්වෙමින්.
රටේ ගැටළු විසඳීම සඳහා රජය විසින් නිසි වැඩපිළිවෙලක් ක්‍රියාත්මක කර ඇති බවයි ඔහු පෙන්වා දෙන්නේ.
“අපිට මේ අවස්ථාවේ දී ගැටලුවක් වී තිබෙන විදේශ විනිමය ඉපැයිමේ ප්‍රධාන ආයතනයක් බවට මෙය පත්වෙනවා. මොකද මේ වෛද්‍ය උපකරණ බොහෝමයක් සියයට 90ක් පමණ අපනයනය සඳහා නිෂ්පාදනය කරන ඒවා විශාල විදේශ විනිමයක් අපිට උපයා දෙනවා. තරුණ තරුණියන්ගේ රැකියා ප්‍රශ්නයටත් යම් ආකාරයකට උදව් වෙනවා.
මේ මාසයේ 25 වනදා තොරතුරු තාක්ෂණය පිළිබඳ ලෝකයේ තියෙන ප්‍රධානතම ආයතනයක් මේ රටේ ආරම්භ කරනවා. ඔවුන්ගේ ක්‍රියාවලිය තුළින් ශ්‍රී ලාංකීක තරුණයින් 2,000කට ක්ෂණිකව රැකියා සැපයීමට හැකියාව තිබෙනවා. ඒ අනුව අපි බලාපොරොත්තු වෙනවා අපිට මේ අවස්ථාවේ දී මුහුණපාලා තියෙන ප්‍රධාන ප්‍රශ්න කිහිපයකට ඉදිරි කාලයේ දී ඉතාම සාධනීය විසඳුමක් දෙන්න.”
