තහනම් ත්‍රස්තවාදී සංවිධාන සමග බුද්ධි තොරතුරු හුවමාරු කරගත් බවට අන්තර්ජාතික ආරක්ෂක විශ්ලේෂකයන් ඇමරිකාවට චෝදනා කර තිබේ.
මීට හේතුවී ඇත්තේ කාබුල්හි ප්‍රහාර එල්ලවීම සම්බන්ධයෙන් ඇමරිකාව තලේබාන් සංවිධානය සමග බුද්ධි තොරතුරු හුවමාරු කර ගැනීම හේතුවෙනි.
ඇමරිකාව මේ වනවිට තලේබාන්වරුන් සමග අවබෝධයෙන් කටයුතු කළත් එම බුද්ධි තොරතුරු මේ වන විට තලේබාන් සංවිධානයේ ප්‍රධාන බලවේගයක් බවට පත්ව ඇති හක්කානි ත්‍රස්ත ජාලය වෙතද ලැබෙන බව අදාළ ආරක්ෂක විශ්ලේෂකයන්ගේ අදහසයි.
හක්කානි ජාලය ඇමරිකානු හමුදාවන්ට එරෙහිව ප්‍රහාර රැසක් එල්ල කළ දරුණු ගනයේ අන්තවාදී ත්‍රස්ත සංවිධානයක් ලෙස සැලකෙන අතර ඔවුන්ගේ නායකයා වන කලීල් හක්කානි අල්ලා දෙන අයෙකුට ඩොලර් මිලියන 05ක ත්‍යාග මුදලක් දෙන බවට ද ප්‍රකාශ වී ඇත.
තලේබාන් සංවිධානය මෙන්ම අල්කයිඩා සංවිධානය සමගද සමීපව කටයුතු කරන හක්කානි ජාලය මේ වන විට කාබුල්හි ආරක්ෂාව භාරව සිටින බව ද පැවසේ.
කෙසේවෙතත්, මෙම බුද්ධි තොරතුරු හුවමාරු චෝදනාවට පිළිතුරු දී ඇති ඇමරිකානු රාජ්‍ය දෙපාර්තමේන්තුවේ ප්‍රකාශක නෙඩ් ප්‍රයිස් සදහන් කර ඇත්තේ තලේබාන්වරුන් සහ හක්කානිවරුන් යනු සංවිධාන දෙකක් බවයි.
