මුතුරාජවෙල රක්ෂිතයේ ප්රේරණ කලාපයෙහි අක්කර 100ක් ගොඩකරමින් ඉදිකිරීමට සැලසුම් කර ඇති සංවර්ධන ව්යාපෘතිය යළිත් හොර රහසේම ආරම්භ කිරීමට නාගරික සංවර්ධන අධිකාරිය කටයුතු කරමින් සිටින බවට කොළඹ අගරදගුරු මැල්කම් රංජිත් කාදිනල් හිමියන් චෝදනා කරයි.
ඊයේ (05) පැවැත්වූ විශේෂ මාධ්ය හමුවක් අමතමින් අගරදගුරු හිමියන් පවසා සිටියේ ජනපති, අගමැති හෝ අමාත්ය මණ්ඩලයට රට අයිති නොමැති බව සිහියේ තබාගත යුතු බවයි.
මුතුරාජවෙලට සිදුකිරීමට සූදානම් වන හානිය හරහා විශාල පරිසර හානියක් සිදුවනවා මෙන්ම ජලය ගැලීමෙන් ප්රදේශවාසීන්ටද විවිධ පීඩාවන් සිදුවිය හැකි බවයි කාදිනල් හිමියන් පෙන්වා දෙන්නේ.
මෙහිදී වැඩිදුරටත් අදහස් දැක්වූ කාදිනල් හිමියන්,
“දැන් මාස කිහිපයක ඉඳන් අපි මුතුරාජවෙලට අත තියන්න එපා කියලා ජනතාවගේ හඬ නැගීමක් කළා. ඒක මේ නිලධාරීන් ඔක්කොමලා දන්නවා. එහෙම දැන දැනත් ආයෙත් සැරයක් හොර රහසින්ම ආරක්ෂිත ප්රදේශයට, බෆර් සෝන් එකක් වෙන මෙම කලාපයේ අක්කර සීයක් මුහුදු වැලි වලින් ගොඩකරලා කරන්නට යන මහා විනාශය පිළිබඳ අපේ විරෝධය පළකරලා මම අද ලිපියක් යැව්වා. බෆර් සෝන් එක ඇතුළේ අක්කර 100ක් ගොඩකරනවා කියන්නෙ මේ මිනිස්සුන්ට බෝට්ටුවක් අරන් තියාගන්න වෙනවා ගෙදර මීට පස්සෙ ඔය පැත්තෙ ඉන්න හැමෝටම. ඇයි ? එක්කෝ පීනන්න දැනගන්න ඕනෙ, නැත්නම් බෝට්ටුවෙන් යන්න පුරුදුවෙන්න ඕනෙ.
රජයක් මතක තියාගත යුතු දෙයක් තියෙනවා. ජනාධිපති කෙනෙක්, අගමැති කෙනෙක්, මැති ඇමතිවරු මතක තියාගත යුතු එක දෙයක් තියෙනවා. රට ඒගොල්ලන්ට අයිති නෑ, රට අයිති ජනතාවට. ඒගොල්ලන්ට අවුරුදු පහකට ඒකෙ බාරකාරීත්වය පමණයි ලබාදීලා තියෙන්නෙ. ඒ නිසා ජනතාවගේ කැමැත්ත නැතුව හිතුවක්කාර විදියට ව්යාපෘති කරන්න ඒගොල්ලන්ට අපි බලයක් දීලා නෑ. කරුණාකරලා ඔය නාගරික සංවර්ධන අමාත්යාංශය කියන එක මතක තියාගන්න ඕගොල්ලන්ට අපි මේ ප්රදේශ බාරදුන්නෙ නෑ, ජනාධිපතිතුමාටත් එහෙම බලයක් දුන්නෙ නෑ අපි.
අනිත් එක තමන් දන්නෙ නැති දේවල් ගැන කතා කරන්න යන්නත් එපා. තමන්ට ආචාර්ය පදවි තිබුණා කියලා හැමදේම දන්නෙ නෑ, තමන් දන්නැති දේවල් ගැන කියන්න එපා, මේ මුතුරාජවෙල ප්රදේශයට අත තියන්න එපා ! ඒ ප්රදේශයේ මේ සංවර්ධන ව්යාපෘති කරන්න අපි දෙන්නේ නෑ”