මෙවර මහනුවර දළදා මාලිගාවේ ඇසළ පෙරහැර මංගල්‍ය ජනතා සහභාගිත්වයකින් තොරව සිදුකිරීමට තීරණය කළ බව දියවඩන නිළමේ ප්‍රදීප් නිලංග දෑල මහතා පවසනවා.
මහනුවර ප්‍රදේශයේ පැවැති ප්‍රවෘත්ති සාකච්ඡාවකට එක්වෙමින් දියවඩන නිලමේවරයා පැවසුවේ පවතින වසංගත තත්ත්වය හමුවේ සෞඛ්‍ය මාර්ගෝපදේශවලට අනුකූලව මෙවර පෙරහැර පැවැත්වීමට සැලසුම් කර ඇති බවයි.
ඒ අනුව පළමු කුඹල් පෙරහැර අගෝස්තු මස 13 වන දින වීදි සංචාරය කිරීමට නියමිතව ඇති අතර එය අගෝස්තු 17 වන දින දක්වා පැවැත්වීමට නියමිතයි.
අගෝස්තු 18 වන දින පළමු රන්දෝලි පෙරහැර වීදි සංචාරය කරනු ලබන අතර දින 5ක් පුරා රන්දෝලි පෙරහැර පෙර පරිදිම පැවැත්වීමට කටයුතු යොදා තිබෙනවා.
ඒ අනුව අවසන් රන්දෝලි පෙරහැර අගෝස්තු 22 වන දා පැවැත්වීමට නියමිත බව ද දියවඩන නිලමේවරයා සඳහන් කළා.
අගෝස්තු 23 වන දා සිව් මහා දේවාල කේන්ද්‍ර කර ගනිමින් දිය කැපීමේ මංගල්‍යය පවත්වා දිවා පෙරහැර පවත්වා ගෙවැදීමෙන් පසු මෙවර ඇසළ පෙරහැර මංගල්‍යය අවසන් වීමට නියමිතයි.
