නිමා වූ ශ්‍රී ලංකා දකුණු අප්‍රිකා පන්දුවාර 20 තරඟ මාලාවේ දී ශ්‍රී ලංකා කණ්ඩායමේ ඇතැම් ක්‍රීඩකයින් වුවමනාවෙන් අඩු දක්ෂතා පෙන්වමින් තරඟාවලිය පරාජය කරා ගෙන ගිය බවට ඇතැම් මාධ්‍ය සිදුකරන වාර්තා තරයේ ප්‍රතික්ෂේප කරන බව ශ්‍රී ලංකා ක්‍රිකට් ආයතනය නිවේදනයක් නිකුත් කරමින් පවසනවා.
එවැනි ක්‍රීඩක හැසිරීමක් සම්බන්ධයෙන් කණ්ඩායම් කළමනාකාරිත්වයෙන් හෝ වෙනයම් පාර්ශවයකින් ශ්‍රී ලංකා ක්‍රිකට් ආයතනය වෙත මෙතෙක් කිසිදු පැමිණිල්ලක් හෝ ලැබී නැතැයිද එම නිවේදනයේ සඳහන්.
ශ්‍රී ලංකා ක්‍රිකට් නිකුත් කළ නිවේදනයේ දැක්වෙන්නේ පන්දුවාර 20 තරඟාවලිය සඳහා එක් වූයේ දකුණු අප්‍රිකාව සමග තරඟ තුනට දෙකක් ලෙස එක්දින තරගාවලිය ජයග්‍රහණය කළ ක්‍රීඩක සංචිතයම බවයි.
මෙලෙස වගකීම් විරහිත ලෙස සිදුකරන විවිධ මාධ්‍ය ප්‍රචාර ක්‍රීඩකයින්ගේ මානසික ඒකාග්‍රතාවට දැඩි බලපෑම් සිදු කරන බවත් එය එළඹෙන T20 ලෝක කුසලාන තරඟාවලියට කිසිසේත් යහපත් තත්ත්වයක් නොවන බවත් ශ්‍රී ලංකා ක්‍රිකට් ආයතනය අවධාරණය කරනවා.
එමෙන්ම මේ වන විට ශ්‍රී ලංකා කණ්ඩායම නවක සහ අත්දැකීම් සහිත ක්‍රීඩකයින්ගේ එකමුතුවෙන් නිවැරදි දිශාවට ගමන් කරන බවත් පසුගිය කාලසීමාව තුළදී කණ්ඩායම ජයග්‍රහණයේ රිද්මය කරා ළඟා වෙමින් පවතින අයුරු මෙරට ක්‍රීඩා ලෝලීන් පවා අතිශය ධනාත්මක අයුරින් පිළිගත් බවත් එම නිවේදනයේ දැක්වෙනවා.
මාධ්‍ය සදාචාරය සහ රීතීන් උල්ලංඝනය කරමින් කිසිදු සොයා බැලීමකින් තොරව සිදුකරනු ලබන මෙවැනි සත්‍යයෙන් තොර ගොතන ලද ප්‍රචාරණ තුළින් එළඹෙන පන්දුවාර 20 ලෝක කුසලාන තරඟාවලි සඳහා සහභාගීවන ක්‍රීඩකයින්ගේ සූදානමට බලපෑම් සිදු නොකරන ලෙස ශ්‍රී ලංකා ක්‍රිකට් ආයතනය සිය නිවේදනය මගින් ඉල්ලා සිටිනවා.
