ලෝක පාපන්දු ශ්‍රේණිගත කිරීම්හි දෙවන ස්ථානයේ පසුවන බෙල්ජියම් කණ්ඩායමට විසි එක් වැනි සියවසේ පළමු වරට ලෝක මට්ටමේ හෝ යුරෝපා මට්ටමේ පාපන්දු තරගාවලියකදී පලමු වටයෙන් ම ඉවත් වන්නට සිදු වුණා.
ඒ කටාර් හි පැවැත්වෙන ලෝක කුසලාන පාපන්දු තරගාවලියේ එෆ් කාන්ඩයේ ක්‍රොඒෂියා කණ්ඩායම සමග පැවති තීරණාත්මක තරගය ජය පරාජයෙන් තොරව නිමා වීමත් සමඟයි.
මේ තරගයේ සම්පූර්ණ කාලය තුළදී කණ්ඩායම් දෙකටම ගෝල ලබා ගැනීමට නොහැකි වුණා.
මේ තරගයේ දී බෙල්ජියම් කණ්ඩායමට සහ ක්‍රොඒෂියා කණ්ඩායමට ගෝල වාර්තා කිරීමේ අවස්ථා කිහිපයක් ලැබුණද ඒවා නිසි ලෙස කළමනාකරණය කර ගැනීමට කණ්ඩායම් දෙකටම හැකියාවක් ලැබුණේ නැහැ.
එෆ් කාණ්ඩයෙන් තරග වැදී ක්‍රොඒෂියාව එම කාණ්ඩයේ දෙවැනි ස්ථානයට පත්වූයේ තරග තුනකට එක් වී එක් තරගයක් ජයග්‍රහණය කර තරග දෙකක් ජය පරාජයෙන් තොරව නිමා කර ගනිමින්.
ඒ අනුව ඔවුන් ඉදිරියේ සටහන්වී තිබුණු ප්‍රසාද ලකුණු සංඛ්‍යාව පහක්.
බෙල්ජියම් කණ්ඩායම මෙම තරගාවලිය තුළ දී තරග තුනකට එක් වී එක් තරගයක් ජයග්‍රහණය කර එක් තරගයක් පරාජය වී එක් තරගයක් ජය පරාජයෙන් තොරව නිමා කර ගැනීම හේතුවෙන් ඔවුන්ට හිමිව තිබුණේ ප්‍රසාද ලකුණු 4ක් පමණයි.
සමස්ත කණ්ඩායම් වටයේ තරගවලදී සහභාගි වූ තරග තුනෙන් දෙකක් ජයගෙන එක් තරගයක් ජය පරාජයෙන් තොරව නිමා කළ මොරොක්කෝ කණ්ඩායම එෆ් කාණ්ඩයේ පෙරමුණ ගත්තා.
ඔවුන් එෆ් කාණ්ඩයේ අවසන් තරගයට එක් වූයේ කැනඩාව සමගයි.
එම තරගය 2 -1 ලෙස ජය ගැනීමට සමත් වූ මොරොක්කෝව ලෝක කුසලාන පාපන්දු තරගාවලියක පිලිමලුන් පිටුදැකීමේ වටයට සුදුසුකම් ලැබුවේ වසර 36කට පසුවයි.
