1987 වසරේදී දෙමළ ජනතාවගේ දේශපාලන ඉල්ලීම් වෙනුවෙන් මාරාන්තික උපවාසයක නියැළී මියගිය තිලීපන් හෙවත් රාසයියා පාර්තීපන් නම් හිටපු LTTE සාමාජිකයා සැමරීම වෙනුවෙන් ගමන්ගත් සාමකාමී රථ පෙළපාලියකට ඊයේ (17) ත්‍රිකුණාමල ප්‍රදේශයේදී සිංහල මැර කණ්ඩායමක් විසින් පහරදී තිබුණා.
තිලීපන්ගේ 36 වැනි සැමරුම වෙනුවෙන් නැගෙනහිර පළාතේ සිට උතුර පළාතට මෙම රථ පෙළපාලිය ගමන් කරමින් තිබියදී අදාළ පහරදීම සිදුව තිබෙනවා.
ඊයේ (17) පස්වරුවේ මෙම රථ පෙළපාලිය ත්‍රිකුණාමලය හරහා ගමන් කරමින් තිබියදී ත්‍රිකුණාමලය සර්ධාපුර 6 කණුව අසල රැඳී සිටි පිරිසකගෙන් ඊට විරෝධයක් එල්ල වුණා.
මෙම රථ පෙළපාලියට යාපනය දිස්ත්‍රික් පාර්ලිමේන්තු මන්ත්‍රී සෙල්වරාජා කජේන්ද්‍රන් මහතාද එක්ව සිටි අතර එහිදී විරෝධතාකරුවන් කිහිපදෙනෙක් පොලිස් නිලධාරීන් ඉදිරිපිටදීම කජේන්ද්‍රන් මන්ත්‍රීවරයාට පහරදී තිබුණා.
මෙහිදී එහි සිටි තවත් පිරිසක් මන්ත්‍රිවරයා යතුරුපැදියකින් එම ස්ථානයෙන් පිටත් කරවීමට කටයුතු කර තිබෙනවා.
පහරදීම් සියල්ල සිදුවන තුරු පොලීසිය නිහඩව බලා සිටීමද විශේෂත්වයක්.
මෙම මැර ප්‍රහාරය සම්බන්ධයෙන් කිසිවකු අත්අඩංගුවට ගෙන නොමැති අතර පොලිසිය පවසන්නේ තමන්ට ඒ සම්බන්ධයෙන් පැමිණිල්ලක් ලැබී නොමැති බවයි.
