හික්කඩුව සෞඛ්‍ය වෛද්‍ය නිලධාරී කාර්යාලය මගින් දොඩන්දූව ප්‍රදේශයේ රෝහණ බාලිකා විද්‍යාලයේ පසුගිය 27 වන දා සිදුකළ එන්නත් ලබාදීමේ වැඩසටහනේ දී ඇති වූ අර්බුදකාරී තත්ත්වය සම්බන්ධයෙන් සමාජ මාධ්‍යයට ප්‍රකාශයක් ලබාදුන් පුද්ගලයාගෙන් පොලීසිය ප්‍රකාශයක් සටහන් කරගෙන තිබෙනවා.
එම එන්නත්කරණ වැඩසටහනේදී එන්නත ලබාගත් බවට පැමිණ සිටි පිරිසගේ කාඩ්පත්වල සලකුණු කළ නමුත්, ඔවුන්ට එන්නත් ලබානොදී ආපසු හරවා යැවීමට එහි සිටි සෞඛ්‍ය නිලධාරීන් කටයුතු කළ බව අදාල තරුණයා සජීවීව සමාජ මාධ්‍ය හරහා පෙන්වා දුන්නා.
කෙසේවෙතත් ඔහුගේ අනාවරණය සම්බන්ධව ප්‍රකාශයක් ලබා දෙන ලෙසට පොලිසිය කළ දැනුම්දීමකට අදාලව ඊයේ (31) දින ඔහු නීතිඥවරුන් පිරිසක්ද සමග ගාල්ල පොලිස් ස්ථානයට පැමිණියා.
තමන් කතා කළේ ජනතාව වෙනුවෙන් බවත් තමන්ට එරෙහිව යමෙකු පැමිණිල්ලක් කර ඇති නිසා පොලිසිය විසින් තමන්ව අත්අඩංගුවට ගනී යැයි තමන්ට බියක් ඇති බවත් එහිදී ඔහු පවසා සිටියා.
