පසුගිය ජුනි මස 8 වැනිදා පැවති පාර්ලිමේන්තු සැසිවාරයේදී දෙමළ ජාතික සන්ධානයේ මඩකලපු දිස්ත්‍රික් පාර්ලිමේන්තු ශානික්‍යන් රාසපුත්‍රම් රාසමානික්කම් මහතා වාචික පිළිතුරු අපේක්ෂාවෙන් අධ්‍යාපනය සම්බන්දයෙන් ගැටළුවක් ඉදිරිපත් කළා.
ඒ බොහෝ නිවාසවල එක පවුලකට එක ජංගම දුරකතනයක් ඇති පසුබිමක දරුවන් දෙදෙනෙකු හෝ ඊට වැඩි දෙනෙක් සිටින පවුලක දරුවන් හට Zoom යෙදුම (App) හරහා පන්ති පැවැත්වීමේදී අපහසුතාවයට පත්වන බවයි.
එම නිසාවෙන් අදාළ ඔන්ලයින් පන්ති පටිගත කර Youtube හරහා දරුවන්ට පසුව ඉගෙන ගැනීමේ ක්‍රමවේදයක් සකසන ලෙසට මන්ත්‍රීවරයා මෙහිදී ඉල්ලා සිටියා.
ඊට පිළිතුරු දෙමින් ක්‍රීඩා අමාත්‍ය නාමල් රාජපක්ෂ මහතා සදහන් කළේ මෙම තත්ත්වය පිළිබදව විදුලි සංදේශ නියාමන කොමිෂම. තොරතුරු හා සන්නිවේදන තාක්ෂණ ඒජන්සිය හා අධ්‍යාපන අමාත්‍යවරයා සමඟ සාකච්ඡා කළ බවයි.
ඒ අනුව Zoom යෙදුම (App) වෙනුවට තොරතුරු හා සන්නිවේදන තාක්ෂණ ඒජන්සිය විසින් සකසන ලද නව යෙදුමක් (App) ඇති බවයි.
එය කිසිදු ඩේටා වැයවීමකින් තොරව දරුවන්ට භාවිතා කිරීමේ ක්‍රමවේදයක් විදුලි සංදේශ නියාමන කොමිසම විසින් සකසා ඇති බවත් එය තවත් සති කිහිපයකින් ලබාදීමට කටයුතු කරන බවත් නාමල් රාජපක්ෂ මහතා මෙහිදී සඳහන් කළා.
කෙසේ වෙතත් අදාළ ප්‍රකාශය සිදුකර මේ වන විට මාසයකටත් වැඩි කාලයක් ගතව ඇතත් මේ වන තෙක් ඩේටා ගාස්තු රහිත එම යෙදුම දරුවන්ට ලැබීමට සලස්වා නැති තත්ත්වයක් උදාවී තිබෙනවා.
ඩේටා ගාස්තු සම්බන්දයෙන් වරින් වර අවස්ථා ගණනාවකදී දරුවන්ගෙන් හා දෙමාපියන්ගෙන් මැසිවිලි නැගුනද මේ වන විටත් ඒ සඳහා නිසි ක්‍රමවේදයක් සැකසීමට නොමැතිවීමෙන් දරුවන් මෙන්ම දෙමාපියන්ද දැඩි අසීරුතාවයට පත්ව ඇති බව ගුරු සංගම් චෝදනා කරනවා.
