මෙරට සංගීත ක්ෂේත්‍රයේ ආදරණීය නාමයක් වන ලක්ෂමන් විජේසේකර මහතා අභාවප්‍රාප්ත වී තිබෙනවා.
මියයන විට ඔහු 73 හැවිරිදි වියේ පසු වූ ඔහු දිගු කලක් පුරාවට අසනීප තත්වයේ පසුවුණා.
සංගීතවේදියකු මෙන්ම රංගන ශිල්පියෙකු වන ලක්ෂමන් විජේසේකර මහතා ‘ගංඟා හා නිශ්ශංක’ ටෙලි නාට්‍යයේ සිදුකල රංගනය හේතුවෙන් ප්‍රේක්ෂකයන්ගේ වැඩි ආදරයක් දිනාගත්තා.
දැල් වු පහන්, ඇති දේ ඇති සැටියෙන්, සිනා පිපෙනා මේ වසන්තය, ඔබ මට තරුවකි, දෑත දෙපාලන ගිගිර සරින්, සුපෙම් හැඟුම් ඔබෙන් එපා, මේ ප්‍රේම සීමා මාලකේ, සඳ කිණිති නැමී ආදි ගීත හේතුවෙන් රසිකයන් අතර බෙහෙවින් ජනප්‍රිය වුණා.
ඔහුගේ බිරිද වන ප්‍රවීණ රංගන ශිල්පිනී චන්ද්‍රා කළුආරච්චි මහත්මිය 2019 වසරේ නොවැම්බර් 01 වනදා අභාවප්‍රාප්ත වුණා.
රංගන ශිල්පිනි අමා විජේසේකර මහත්මිය ලක්ෂ්මන් විජේසේකර මහතාගේ දියණිය වන අතර දේශපාලඥයෙකු මෙන්ම ලේඛකයෙකු වන විමල් කැටිපෙආරච්චි මහතා ඔහුගේ බෑණනුවන් වනවා.
2014 වසරේ දෙසැම්බර් මස 29 වනදා තඹුත්තේගම ප්‍රදේශයේදී ලක්ෂ්මන් විජේසේකර මහතා හට පහරදීමක් සිදුවුණා.
ඒ එවක පොදු අපේක්ෂකයා ලෙස ජනාධිපතිවරණයට ඉදිරිපත් වූ මෛත්‍රිපාල සිරිසේන මහතාට සහය දැක්වීමේ ප්‍රචාරක කටයුත්තකට සහභාගී වූ නිසාවෙනි.
අභාවප්‍රාප්ත සංගීතවේදී ලක්ෂ්මන් විජේසේකර මහතාගේ දේහය මහජන ගෞරවය සදහා හෙට (13) දින ගල්කිස්ස කලාපුරයේ පිහිටි ඔහුගේ නිවසේ තැන්පත් කර තිබෙනවා.
දේහය පිළිබඳ අවසන් කටයුතු එළැඹෙන ඉරිදා (14) ගල්කිස්ස පොදු සුසාන භුමියේ දී සිදු කිරීමට නියමිතයි.
