ජනාධිපතිවරයා සිය වගකීම පැහැර හැර රටින් පලා ගොස් ඇති බැවින් ඔහු ඉල්ලා අස්වන තෙක් බලා සිටීම විකාර සහගත බව ජනතා විමුක්ති පෙරමුණ පවසනවා.
අද (14) පැවති ප්‍රවෘත්ති සාකච්ඡාවකදී ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත් මහතා ප්‍රකාශ කළේ ආණ්ඩුක්‍රම ව්‍යවස්ථාවට අනුව නව ජනාධිපතිවරයෙකු තෝරා ගැනීමට පාර්ලිමේන්තුවට අයිතියක් ඇති බවයි.
ජනාධිපතිවරයා සිය ඉල්ලා අස්වීම නිල වශයෙන් ඉදිරිපත් නොකර රටින් පලා ගියේ නම් එය එම ධුරයෙන් ඉවත්වීමක් ලෙස උපකල්පනය කළ හැකි බව ඔහු පවසනවා.
ටියුනීසියානු ජනාධිපති බෙන් අලි සිය ඉල්ලා අස්වීම නිල වශයෙන් ප්‍රකාශ නොකර රටින් පලා යාම මීට සමාන සිදුවීමක් බව ඔහු පෙන්වා දෙනවා.
විජිත හේරත් මන්ත්‍රීවරයා පැවසුවේ ආණ්ඩුක්‍රම ව්‍යවස්ථාවේ 38(2) ව්‍යවස්ථාවේ ප්‍රතිපාදන අනුව කථානායකවරයාට සහ අගවිනිසුරුවරයාට පාර්ලිමේන්තුව හරහා නව ජනාධිපතිවරයෙකු පත්කිරීම සම්බන්ධයෙන් තීරණයක් ගත හැකි බවයි.
එමෙන්ම රට යථා තත්ත්වයට පත් කිරීමට නම් ජනාධිපති සහ අගමැති යන දෙදෙනාම ඉල්ලා අස්විය යුතු බව ඔහු වැඩිදුරටත් සදහන් කරනවා.
