ඉන්දියාව සහ එක්සත් ජනපදය අතර පවත්නා ආකාරයටම එක්සත් ජනපදය සහ පාකිස්තානය අතර ගෞරවනීය සබඳතාවක් පැවතීම තමාට අවශ්ය බව පාකිස්තානයේ හිටපු අගමැති ඉම්රාන් ඛාන් ප්රකාශ කර තිබේ.
එක්සත් රාජධානිය පදනම් කරගත් ප්රකාශනයක් වන ෆිනෑන්ෂල් ටයිම්ස් සමඟ මෑත සම්මුඛ සාකච්ඡාවකදී ඛාන් ප්රකාශ කළේ ඉන්දියාවට එක්සත් ජනපදය සමඟ ඉතා ගෞරවනීය සම්බන්ධතාවයක් ඇති බවයි.
තමාට මූලික වශයෙන් අවශ්ය වන්නේ ඉන්දියාව සමග මෙන් පාකිස්තානයට එක්සත් ජනපදය සමඟ ගෞරවනීය සම්බන්ධතාවයක් පවත්වා ගැනීම බව ඔහු එහිදී පැවසීය.
ඔහුගේ මෙම ප්රකාශය පැමිණෙන්නේ මාස කිහිපයකට පෙර තමා අගමැති ධුරයෙන් ඉවත් කිරීමට එක්සත් ජනපදය කුමන්ත්රණය කළ බවට ඛාන් කළ ප්රකාශයත් සමගයි.
පවතින යුද්ධය නොතකා රුසියානු තෙල් ආනයනය කිරීමට ඉන්දියාව ගත් තීරණය උපුටා දක්වමින් , ඉන්දියාව එක්සත් ජනපද ඉල්ලීමට ඉඩ නොදී එහි ජනතාවට ප්රමුඛත්වය දෙන බව ඉම්රාන් ඛාන් සදහන් කර ඇත.
පාකිස්තානය එක්සත් ජනපදය සමඟ හවුල්කරුවන් වීමට අවශ්ය නමුත් පාකිස්තානයට ඔවුන්ගේ තීරණ වෙනුවෙන් ඉඩ දිය යුතු අවස්ථා තිබිය යුතු බව ඔහු පැවසීය.
ඉස්ලාමාබාද් සහ වොෂින්ටනය අතර සබඳතාව “ස්වාමියා-සේවකයෙකුට” සමාන බවත් පකිස්තානය “කුලියට ගත් තුවක්කුවක්” ලෙස භාවිතා කර ඇති බව පවසමින් ඛාන් පසුගිය රජයන්ට දොස් පවරා තිබේ.
එක්සත් ජනපදය සමඟ පාකිස්තානයේ සබඳතාව ස්වාමි-සේවක සබඳතාවක් හෝ ස්වාමි-වහල් සම්බන්ධතාවයක් ලෙස පැවතුන බවත් ඒ සඳහා තමන් එක්සත් ජනපදයට වඩා තමාගේම ආණ්ඩුවලට දොස් පවරන බවත් ඔහු සදහන් කර ඇත.