වත්තල නගරය කොළඹ දිස්ත්‍රික්කයට සම්බන්ධ කර එය කොළඹ 16 ලෙස නම් කරන බව ග්‍රාමීය මාර්ග සහ අවශේෂ යටිතල පහසුකම් රාජ්‍ය අමාත්‍ය නිමල් ලන්සා පවසා ඇත.
ඒ දෙසැම්බර් 20 වැනි දින දික්ඕවිට, කෙරවලපිටිය කර්මාන්තපුර ප්‍රවේශ මාර්ගය කාපට් ඇතිරීමේ උත්සවයට සහභාගි වෙමිනි.
රාජ්‍ය අමාත්‍යවරයා එහිදී මෙසේද පැවැසීය.
‘‘වත්තල කියන්නේ කුණු ගොඩක් නොවෙයි. ලංකාවේ කුණු කසළ දැන් වත්තලට ගේනවා. මුතුරාජවෙල අභයභූමිය විනාශ වෙලා. මහ පරිමාණ ව්‍යාපාරිකයෙක් මුතුරාජවෙල අභයභූමියේ අක්කර 600ක් අල්ලගෙන නීතිවිරෝධි ව්‍යාපෘති ආරම්භ කරනවා. මේ සියලු කටයුතුවලට විරුද්ධව නීත්‍යානුකූල ක්‍රියාමාර්ග ගන්න.
මාර්ග සංවර්ධන අධිකාරිය යටතේ රුපියල් මිලියන 123ක වියදමින් කිලෝමීටර් දෙකයි දශම දෙකක් දිග මාර්ගය කාපට් කරනවා.
මෙම මාර්ගය තමයි වත්තල ඇති ප්‍රධානතම මාර්ගය. කර්මාන්තපුරයේ විදුලි බලාගාරය, ගෑස් කර්මාන්ත ශාලාව හා ඛනිජ තෙල් නීතිගත සංස්ථාව ආදි වැදගත් ආයතන රැසක් ඇති ප්‍රදේශයක් මේක. මෙහි ඇවිදීමේ මංතීරුවකුත් හදනවා.
අපි හදන මෙම මාර්ග කොන්ත්‍රාත්කරුවන්ට දෙන්නේ නැහැ. මාර්ග සංවර්ධන අධිකාරියේ දක්ෂ ඉන්ජිනේරු මෙන්ම දක්ෂ නිලධාරීන් ඉන්නවා. මින් ඉදිරියට ඒ අය තමයි මේ සියලු කාර්යයන් සිදුකරන්නේ.’’
