පාස්කු ඉරුදින ත්‍රස්ත ප්‍රහාරය පිටුපස දේශපාලන කුමන්ත්‍රණයක් ඇතැයි කතෝලික සභාව විශ්වාස කරන බව ගරු සිරිල් ගාමිණි පියතුමන් පවසනවා.
රාජ්‍ය බුද්ධි සේවයේ අධ්‍යක්ෂවරයා සිදුකරනු ලැබු පැමිණිල්ලට අනුව තෙවන දිනටත් පැය 04කට ආසන්න කාලයක් අපරාධ පරීක්ෂණ දෙපාර්තමේන්තුව හමුවේ ප්‍රකාශ ලබාදීමෙන් පසු පිටතට පැමිණි පියතුමන් මාධ්‍යවේදින් ඇසු ප්‍රශ්නවලට පිළිතුරු දෙමින් ඒ බව කියා සිටියා.
පාස්කු ඉරුදින ත්‍රස්ත ප්‍රහාරය එල්ල කළ ත්‍රස්තවාදීන්ට මෙරට බුද්ධි අංශ අනුග්‍රහය දක්වා ඇතැයි කළ ප්‍රකාශයට අදාළව ඉකුත් 15 වනදා සහ 16 වනදා අපරාධ පරීක්ෂණ දෙපාර්තමේන්තුව සිරිල් ගාමිණි පියතුමන්ගෙන් පැය 16කට ආසන්න කාලයක් ප්‍රකාශ ලබාගත්තා.
අනතුරුව තෙවන දිනටත් කර තිබු කැදවීම තමන් ප්‍රතික්ෂේප කළ බව සිරිල් ගාමිණි පියතුමන් 16වනදා පැවසුවද ඊයේ (22) දින යළිත් ප්‍රකාශ ලබාදීම සඳහා පියතුමන් පෙ.ව 9.45ට පමණ අපරාධ පරීක්ෂණ කොහෙ පාර්තමේන්තුව ට පැමිණියා.
එහිදී පැය හතරකට අධික කාලයක් ප්‍රකාශ ලබාදුන් පියතුමන් ප.ව 1.45ට පමණ පිටතට පැමිණි අතර එහිදි මාධ්‍ය හමුවේ කියා සිටියේ වත්මන් රජයට සහ නීතිපතිවරයාට පාස්කු ප්‍රහාරයේ සැබෑ වරදකරුවන්ට දඩුවම්දීමට අවශ්‍යද යන්න ප්‍රශ්න ගත බවයි.
එමෙන්ම හිටපු නීතිපතිවරයා සිදුකළ ප්‍රකාශයන්ට අනුව තමන් ඇතුලු කතෝලික සභාව පාස්කු ප්‍රහාරය පිටුපස දේශපාලන කුමන්ත්‍රණයක් ඇති බව විශ්වාස කරන බවද පියතුමන් අපරාධ පරීක්ෂණ දෙපාර්තමේන්තුව හමුවේ කියා සිටියා.
ඒ අනුව රාජ්‍ය බුද්ධි සේවයේ අධ්‍යක්ෂවරයා සිදුකළ පැමිණිල්ල සම්බන්ධයෙන් මේවන විට අපරාධ පරීක්ෂණ දෙපාර්තමේන්තුව සිරිල් ගාමිණි පියතුමන්ගෙන් පැය 20කට ආසන්න කාලයක් ප්‍රකාශ සටහන් කරගෙන තිබෙනවා.
