කැරට් 22ට වැඩි රන් භාණ්ඩ පැළඳ ගුවන් මඟීන්ට මෙරටට පැමිණීම අත්හිටුවන බව මුදල් රාජ්ය අමාත්ය රංජිත් සියඹලාපිටිය මහතා පවසනවා.
ඒ අනුව ආනයන අපනයන පාලක ජනරාල්වරියගේ අවසරයකින් තොරව කැරට් 22ට වැඩි භාණ්ඩ මින් පසු පැළඳ පැමිණීමට අවස්ථාව හිමිවන්නේ නැහැ.
ගුවන් මඟින් පැළඳ පැමිණිය හැකි රන් භාණ්ඩවල ප්රමිතියක් හෝ සීමාවක් නොමැති වීමේ අවසරය භාවිතා කරමින් දෛනිකව රත්රන් කිලෝග්රෑම් 50ක් පමණ ජාවාරම්කරුවන් විසින් මෙරටට රැගෙන එන බවට මේ වන විට තොරතුරු අනාවරණය වී තිබෙනවා.
මුදල් රාජ්ය අමාත්යවරයා පවසන්නේ ඇතැම් ජාවාරම්කරුවන් දෛනිකව ආසන්න රටවල් වෙත ගුවන් ගමන් හරහා ගොස් කැරට් 24 රන් පළඳනා සකස් කරගෙන පැමිණෙන බවට තොරතුරු වාර්තා වී ඇති බවයි.
මේ හේතුවෙන් මසකට ශ්රී ලංකාවට ඩොලර් මිලියන 30ක් පමණ අහිමි වන බවයි අමාත්යවරයා පෙන්වා දෙන්නේ.
පසුගියදා මේ සම්බන්ධයෙන් රාජ්ය අමාත්යවරයා විසින් කළ නියෝගයක් මත රේගු අධ්යක්ෂක ජෙනරාල්වරයා විසින් විමර්ෂණ වාර්තාවක් අමාත්යවරයා ලබා දී තිබෙනවා.
අදාළ වාර්තාව අධ්යනය කිරීමෙන් පසු ජාවාරම් කිරීමේ අරමුණින් අනවශ්යය ලෙස රන් භාණ්ඩ පැළඳ මෙරටට ගුවන් මඟීන් ලෙස පැමිණෙන පුද්ගලයින්ට එරෙහිව නීතිය ක්රියාත්මක කිරීමට පියවර ගනු ඇති බවයි මුදල් රාජ්ය අමාත්යවරයා සඳහන් කළේ.
මේ අනුව රන් භාණ්ඩවල තත්ත්වයන් හා ප්රමාණයන් පිළිබඳ සොයා බැලීම සඳහා විශේෂ තාක්ෂණික ක්රමවේදයන් භාවිතා කිරීමට රේගු නිලධාරීන්ට උපදෙස් ලබා දී ඇති බව වාර්තා වනවා.
ඉදිරි සතිය තුළදී ඊට අදාළ ගැසට් නිවේදනය නිකුත් කරන බවයි මුදල් රාජ්ය අමාත්යවරයා සඳහන් කළේ.
කෙසේ වෙතත් විදෙස්ගතව පැමිණෙන ශ්රමිකයින්ට හෝ සාමාන්ය ගුවන් මඟීන්ට අදාළව තීරණයෙන් කිසිඳු පීඩාවක් ඇති නොවන බව රාජ්ය අමාත්යවරයා වැඩිදුරටත් කියා සිටියා.