ෆේස්බුක්, මැසෙන්ජර් සහ ඉන්ස්ටග්‍රෑම් සමාජ මාධ්‍ය හදිසියේ අක්‍රිය වීමෙන්, එම සමාජ මාධ්‍ය හිමිකාරීත්වය දරන මාර්ක් සකර්බර්ග්ගේ ‘මෙටා’ සමාගමට ඇමෙරිකන් ඩොලර් මිලියන 100 ක ආදායමක් අහිමි වී ඇතැයි විදෙස් මාධ්‍ය පවසනවා.
ලොව පුරා ෆේස්බුක්, මැසෙන්ජර් සහ ඉන්ස්ටග්‍රෑම් සමාජ මාධ්‍ය ඊයේ (04) දිනයේදී හදිසි බිඳ වැටීමකට ලක්ව තිබුනා.
එහිදී ෆේස්බුක් පරිශීලකයන්ගෙන් ජංගම දුරකතන යෙදුම හරහා සම්බන්ධවී සිටි සියලුම දෙනාගේ ගිණුම්වලින් කිසිදු දැනුම්දීමකින් තොරවම ඉවත්වීමක් (Logout) සිදුව තිබෙනවා.
මේ හේතුවෙන් ලොව පුරා සිටින සමාජ මාධ්‍ය පරිශීලකයින් බිලියන ගණනක් අපහසුතාවයට ලක්ව තිබුණා.
ෆේස්බුක්, මැසෙන්ජර් සහ ඉන්ස්ටග්‍රෑම් යන සමාජ මාධ්‍ය තුනම මේ අයුරින් එකවිට අක්‍රිය වූ පළමු අවස්ථාව මෙය ලෙස සැලකෙනවා.
මේ අතර, ෆේස්බුක්, මැසෙන්ජර් සහ ඉන්ස්ටග්‍රෑම් සමාජ මාධ්‍ය බිඳ වැටීමෙන් පසු ‘මෙටා’ සමාගමේ කොටස් මිල ද 1.5 % කින් පහත වැටී ඇති බවද වාර්තා වෙනවා.
2021 වසරේදීද Meta සමාගමට අයත් සමාජ මාධ්‍ය ජාලා මෙලෙස බිඳ වැටීමකට ලක් වුණු අතර එය නැවතත් යථා තත්වයට පත් කිරීමට පැය 7 ක පමණ කාලයක් ගත වී තිබුණා.
කෙසේවෙතත් ඊයේ දින හට ගත් බිඳ වැටීම පැය දෙකක පමණ කාලයක් අතරතුර යළි පිළිසකර කර තිබූ අතර Meta හි අභ්‍යන්තර පද්ධති ක්‍රියා විරහිත වීමෙන් හටගත් තාක්ෂණික දෝෂයක් මීට හේතු වී ඇති බවයි වාර්තා වෙන්නේ.
