තීන්දු තීරණ අවිධිමත් ලෙස ගැනීමත්, එන්නත් වැඩසටහන ක්‍රියාත්මක කිරීම සඳහා පැහැදිළි ක්‍රමවේදයක් හදුනාගෙන නොතිබීමත් හේතුවෙන් මේ වනවිට කොවිඩ් එන්නත්කරණ වැඩසටහන අවුල් ජාලයක්වී ඇති බවට ශ්‍රී ලංකා ප්‍රජා වෛද්‍යවරුන්ගේ සංගමය චෝදනා කරනවා.
එම සංගමය පෙන්වා දෙන්නේ එක් එක් පුද්ගලයන්ගේ පෞද්ගලික අවශ්‍යතා ඉටුකිරීමට යාමත්, විවිධ අයගේ අදහස්වලට එකඟවිමත් නිසා කොවිඩ් එන්නත්කරණ වැඩසහටන විසින් ඇතිකරන ගැටළු කෙටිකාලීනව මෙන්ම දිගු කාලීනව අහිතර බලපෑම් ඇතිවිය හැකි බවයි.
එමෙන්ම එන්නත් මුදලට විකිණීම, නුසුදුසු පුද්ගලයින් හට ලබාදීම හා ඇස්ට්‍රාසෙනෙකා පළමු මාත්‍රාව ලබාගත් ලක්ෂ 6 කට ආසන්න පිරිසක් දෙවන මාත්‍රාව නොමැතිව අවිනිශ්චිතභාවයට පත්ව තිබීම හේතුවෙන් තව දුරටත් ගැටළු රැසක් පැනනැගෙන බවයි නිවේදනයක් නිකුත් කරමින් ශ්‍රී ලංකා ප්‍රජා වෛද්‍යවරුන්ගේ සංගමය පෙන්වා දෙන්නේ.
ඊට අමතරව දේශපාලඥයින් විසින් සහ නොයෙක් මාධ්‍ය විසින් කරන ප්‍රකාශ නිසා මෙතෙක් කලක් සාර්ථකව සිදුකරගෙන පැමිණි ජාතික එන්නත්කරණ වැඩසටහන අපකීර්තියට පත්වීමට ඉඩ ඇති බවද අදාළ නිවේදනයෙන් ඔවුන් සදහන් කරනවා.
ඇතිවී තිබෙන මෙම තත්ත්වය පිළිබදව ශ්‍රී ලංකා ප්‍රජා වෛද්‍යවරුන්ගේ සංගමය ලෙස තම සංගමය දැඩිව කණස්සල්ල පලකරන බවයි ඔවුන් සඳහන් කරන්නේ.
