අදට (26) යෙදී තිබෙන වෙසක් පොහෝ දිනය වෙනුවෙන් ජනාධිපති ගෝඨාභය රාජපක්ෂ මහතාගේ නියමය පරිදි සිරකරුවන් 260 කට නිදහස ලබාදුන් බව බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍ය ලොහාන් රත්වත්තේ මහතා පවසනවා.
එම සිරකරුවන් අතර ජීවිතාන්තය දක්වා සිර දඩුවම් හිමිවූ සිරකරුවන් 53 දෙනෙකුද සිටීම විශේෂත්වයක්.
ජීවිතාන්තය දක්වා වූ සිරදඩුවම් ලැබූ රැදවියන් හට වසර 19කට පසු ජනපති සමාව ලැබූ පළමු අවස්ථාවද මෙයයි.
මීට අමතරව තවත් ජීවිතාන්තය දක්වා සිරදඩුවම් හිමිවූ රැදවියන් 194 දෙනෙක් අද දිනයේ සිට සාමාන්‍ය සිරකරුවන් බවට පත්කිරිමට කටයුතු කර තිබෙනවා.
බන්ධනාගාර රැඳවියන් හට සිව් වස් සමාලෝචන ක්‍රියාවලිය යටතේ සමාව ලබාදීමේ ආරම්භක පියවරක් ලෙස මෙම වැඩපිළිවෙල ක්‍රියාත්මක කර ඇති බවත්, ඉදිරියේදී මරණ දඬුවම හිමිවූ බන්ධනාගාර තුළ පුනරුත්ථාපනය වූ සමාජගත කළ හැකි රැඳවියන්ට සමාව ලබාදීමේ ක්‍රියාවලියක් සකස් කරමින් පවතින බවත් රාජ්‍ය අමාත්‍ය ලොහාන් රත්වත්තේ මහතා සඳහන් කරනවා.
