අපරාධ පරීක්ෂණ දෙපාර්තුමේන්තුවේ හිටපු අධ්‍යක්ෂ, ජ්‍යේෂ්ඨ පොලිස් අධිකාරී ශානි අබේසේකර මහතා සහ එම පවුලේ සාමාජිකයන් හට ප්‍රබල ජීවිත අනතුරක් ඇති බවට දන්වමින් අබේසේකර මහතා විසින් පොලිස්පති චන්දන වික්‍රමරත්න මහතා වෙත යොමු කර ඇති ලිපිය සම්බන්ධයෙන් අවධානය යොමු කරන ලෙස ඉල්ලමින් ශ්‍රී ලංකා තරුණ ජනමාධ්‍යවේදීන්ගේ සංගමය විසින් අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වූ ජාතික අධිකාරිය වෙත ලිපියක් යොමු කර තිබෙනවා.
ජනමාධ්‍යවේදීන් අතුරුදහන් කරවීම, වධහිංසා පැමිණවීම සහ ඝාතනය කිරීම ඇතුළු සිදුවීම් ගණනාවක් සම්බන්ධයෙන් විමර්ශන පැවැත්වූ ශානි අබේසේකර මහතාගේ ජීවිතයට තර්ජනයක් සිදුවූහොත් ඒ හරහා ආදාල පරික්ෂණ වලටද දැඩි අගතියක් සිදුවන බවයි එම සංගමය විසින් සිය ලිපියෙන් පෙන්වා දෙන්නේ.
අබේසේකර මහතාව අපරාධ පරීක්ෂණ දෙපාර්තුමේන්තුවෙන් ඉවත් කරනු ලැබුවේ මෙම විමර්ශන අඩපණ කිරීමට බවට මීට පෙරද ශ්‍රී ලංකා තරුණ ජනමාධ්‍යවේදීන්ගේ සංගමය විසින් මානව හිමිකම් කොමිෂන් සභාවට දැනුම් දී ඇති බවත් එබැවින් ඔහුගේ ආරක්ෂාව තහවුරු කිරීම සඳහා මැදිහත්වන ලෙස ඉල්ලා සිටින බවත් අදාළ ලිපියෙන් වැඩිදුරටත් පැවසෙනවා.
