ශ්‍රී ලංකාවේ චීන සංස්කෘතික මධ්‍යස්ථානයෙහි පසුගිය වසර 6 ක ප්‍රගතිය අළලා සකස් කළ ‘THE PEARL OF
THE SILK ROUTE’ ග්‍රන්ථයේ මුල් පිටපත මෙරට චීන සංස්කෘතික මධ්‍යස්ථානයේ අධ්‍යක්ෂ ලිවෙන් යු මහතා විසින් අග්‍රාමාත්‍ය මහින්ද රාජපක්ෂ මහතාට ඊයේ (06) අරලියගහ මන්දිරයේදී පිළිගන්වනු ලැබුවා.
මෙරට චීන සංස්කෘතික මධ්‍යස්ථානයේ අධ්‍යක්ෂ ලිවෙන් යු මහතා සහ චාමර රන්මණ්ඩල මහතා විසින් රචිත මෙම ග්‍රන්ථය පසුගිය වසර 6 ක කාලය තුළ චීන සංස්කෘතික මධ්‍යස්ථානය ඔස්සේ සිදුකළ සුවිශේෂී වැඩසහන්වල ආවර්ජනයක් අන්තර්ගත වන බවයි අග්‍රාමාත්‍ය මාධ්‍ය අංශය නිවේදනය කරන්නේ.
2014 වසරේ සැප්තැම්බර් 16 වනදා මෙරට සංචාරයක නිරතවූ චීන ජනාධිපති ෂී ජි පිං මහතා හා එවක මෙරට ජනාධිපතිව සිටි මහින්ද රාජපක්ෂ මහතාගේ ප්‍රධානත්වයෙන් දකුණු ආසියාවේ පළමු චීන සංස්කෘතික මධ්‍යස්ථානය ආරම්භ වුණා.
ඉන් අනතුරුව වසර 6 ක කාලය පුරාවට එහි අධ්‍යක්ෂ්‍ය ධූරය දරණ ලද්දේ අධ්‍යක්ෂ ලිවෙන් යු මහතායි.
කෙසේ වෙතත් චීන සංස්කෘතික මධ්‍යස්ථානයේ අධ්‍යක්ෂ ලිවෙන් යු මහතා සිය සේවා කාලය අවසන් කොට නැවතත් සිය රට බලා යන බවද මෙම හමුවේදී අග්‍රාමාත්‍ය මහින්ද රාජපක්ෂ මහතාව දැනුවත් කර තිබෙනවා.
