පාස්කු ප්‍රහාරය සම්බන්ධයෙන් විමර්ශනය කරන ජනාධිපති පරීක්ෂණ කොමිසන් සභාව ඉදිරියේ සාක්ෂි දීම සඳහා පාර්ලිමේන්තු මන්ත්‍රී රිෂාඩ් බදුර්දීන්ව නොවැම්බර් (19) දින නිව් මැගසින් බන්ධනාගාරයේ සිට Skype මාර්ගයෙන් කැඳවා තිබුණු අතර සිංහල භාෂාවෙන් පිළිතුරු ලබා දීමේදී මන්ත්‍රීවරයාට ඇතිවු අපහසුතා නිසා භාෂා පරිවර්තකයෙක් ඉල්ලා සිටි බැවින් කොමිෂන් සභාව කල් දමා ඇත.
2020.11.16, 17 දිනයන්හිදී රිෂාඩ් බදියුදීන් මහතා සම්බන්ධව යම් යම් කරුණු කොමිසම් සභාව ඉදිරියේ ඉදිරිපත් වී තිබුණු අතර ඔහුගේ නීතිඥවරයා වන රුෂ්ඩි හබීබ් මහතා විසින් නොවැම්බර් 18 දින පාස්කු කොමිසම ඉදිරියේ කරුණු ඉදිරිපත් කරමින් පවසා ඇත්තේ කොමිසමේ දී ඉදිරිපත් කර තිබු කරුණු විකෘති කර පුවත්පතක පළ කර ඇති බවය.
ඒ අනුව අද දින කොමිසමේ කටයුතු ආවරණය කිරීමට පැමින සිටි මාධ්‍යවේදීන්ට වාර්තා කිරීමේදී කරුණු විකෘති නොකරන ලෙස කොමිසම අවවාද කර ඇත.
තවද එහිදි කොමිසමේ සාමාජිකයන් පවසා ඇත්තේ රිෂාඩ් බදියුදීන් මහතාව රඳවා ඇති නිව් මැගසීන් බන්ධනාගාරයේ ඊ වාට්ටුවේ යාබද කුටිවල සිටින අයට සහ එම වාට්ටුව පවිත්‍ර කිරීමට එන පුද්ගලයෙකුට කොවිඩ් 19 වෛරසය ආසාදනය වී ඇති බව කොමිසමට වාර්තා වී ඇති බවය.
