කොතලාවල ආරක්ෂක විශ්වවිද්‍යාල පනතට එරෙහිව අන්තර් විශ්වවිද්‍යාල ශිෂ්‍ය බලමණ්ඩලය සහ නිදහස් අධ්‍යාපනය උදෙසා සිසු ජන ව්‍යාපාරය එක්ව පැවැත්වූ උද්ඝෝෂණයේ දී අත්අඩංගුවට ගත් පිරිස අධිකරණයෙන් ඇප ලැබුණු පසුව බලහත්කාරයෙන් නිරෝධායනයට ලක් කරනු ලැබුවා.
අධිකරණයෙන් ඇප ලබා තිබියදී පොලීසියේ මැදිහත්වීමෙන් මෙම පිරිස මුලතිව් ගුවන් හමුදා කඳවුරකට නිරෝධායනයට රැගෙන ගියත් එම ස්ථානයට රැගෙන යන තුරුම ඔවුන් ගෙනයන්නේ කුමන ස්ථානයකටදැයි දැනුවත් නොකර රැගෙන යාම විශේෂත්වයක්.
මූලික අයිතිවාසිකම්ද අහිමි කරමින් නිසි පරිදි ආහාරපාන ඇඳුම්පැළඳුම්ද නොමැතිව සිටින පිරිස සම්බන්ධයෙන් ඊයේ (09) පාර්ලිමේන්තුවේදී අමාත්‍ය සරත් වීරසේකර සිදු කළ ප්‍රකාශය සම්බන්ධයෙන් අදහස් දැක්වු ශ්‍රී ලංකා ගුරු සංගමයේ ලේකම් ජෝසෆ් ස්ටාලින් මහතා,
“අද පාර්ලිමේන්තුවේ දී සරත් වීරසේකර අමාත්‍යවරයා කියනවා ඊයේ නිරෝධායනයට යවන කට්ටිය විධිමත්ව සෞඛ්‍යාරක්ෂිත උපදෙස් අනුව යැව්වා කියලා. අමු බොරු කොහොම ද PHI කෙනෙක් බලන්නේවත් නැතුව නිර්දේශ දෙන්නේ? ඒක සම්පූර්ණ පචයක්. අපිට ටූත්පේස්ට් දුන්නේ හාමුදුරුවෝ නමක්. අපිට කිසි රෙදි කෑල්ලක් දුන්නේ නෑ. මේ ඉන්න අය උදේ ඉදලා ඇඳගෙන හිටියේ බෙඩ්ෂීට්. පොලීසියෙන් කිව්වේ යන තැන ඔක්කෝම තියෙනවා කියලා. සරත් වීරසේකර ඇමතිවරයා කියනවා මීගමුව පොලීසියෙන් අපිට බෙහෙත් දුන්නලු. අමු බොරු හලාවත පොලීසිය ළඟ නවත්තලා පාන් කාලයි කෙසෙල් ගෙඩියයි දුන්නේ. හිඟන කෑම වේවා.“
