2019 වර්ෂයේ අයවැයෙන් අධ්‍යාපනයට වෙන්කළ මුදලට සාපේක්ෂව ගත් කළ රුපියල් බිලියන 41 කට ආසන්න මුදලක් මෙවර අයවැයෙන් කප්පාදු කර ඇති බව ලංකා ගුරු සංගමයේ ලේකම් ජෝසෆ් ස්ටාලීන් මහතා පැවසීය.
2019 වසරේ අධ්‍යාපනය සඳහා රුපියල් බිලියනි 167 ක් ක් වෙන් කර තිබූ නමුත් මෙවර අයවැයෙන් අධ්‍යාපන ක්ෂේත‍්‍රයට වෙන්කර ඇත්තේ රුපියල් බිලියන 126 පමණ බවත් මෙවර අයවැයෙන් අධ්‍යාපන ක්ශේත්‍රයේ දියුණුව වෙනුවෙන් කිසිදු සාධනීය යෝජනාවක් ඉදිරිපත් කර නැති බවත් ඒ මහතා පැවසීය.
ග‍්‍රාමීය පාසල්වලට දුරස්ථ අධ්‍යාපනය වෙනුවෙන් රූපවාහිනී යන්ත‍්‍ර මිල දී ගැනීම සඳහා රුපියල් මිලියන 3000 ක් වෙන්කර ඇති අතර විශ්ව විද්‍යාල 4 ක් ආරම්භ කිරීම වෙනුවෙන් රුලියල් මිලියන 1000 ක් වෙන් කර ඇති බවත් , ගුරු සංවර්ධනය හා කෝවිඞ් වසංගත තත්වය තුළ අධ්‍යාපන පද්ධතියේ කඩාවැටීම යළි ගොඩනැගීමට අදාළව නව යෝජනා කිසිවක් මෙම අයවැය තුළ අන්තර්ගත වී නැති බවත් ස්ටාලීන් මහතා පැවසීය.
අධ්‍යාපනයට මෙසේ අඩු මුදලක් වෙන් කරද්දී ආරක්ෂක අමාත්‍යාංශයට රුපියල් බිලියන 355 ක් වෙන් කොට ඇති අතර, පොලීසියට වෙන් කළ මුදල ද ඇතුළත් කළ විට එය බිලියන 440 ක් වන බවත් එම මුදල් ප්‍රමාණය පෙර වසරට සාපෙක්ෂව 12% ක වැඩිවීමක් බවත් ඔහු පවසයි.
කෙසේ වෙතත් රනුග්ගේ වැටුප් කොමිසමෙන් රාජ්‍ය සේවකයින්ට 2020.01.01 දින සිට ගෙවීමට අනුමත කර තිබූ වැටුප් වැඩි කිරීම අයවැයෙන් ලබාදෙන බවට වූ පොරොන්දුව පිළිබඳ හෝ රාජ්‍ය සේවකයන්ගේ වැටුප් වැඩිකිරීම සම්බන්ධයෙන් කිසිදු සඳහනක් නොකර රාජ්‍ය සේවකයින්ට රාජකාරි වේලාවෙන් පසු වෙනත් රැකියාවකට යාමට අවසර ලබාදීම කනගාටුදායක තත්වයක් බවත් පැය 8 ක සේවයෙන් පසු නැවත සේවයේ යෙදී මුදල් උපයන ලෙස ප‍්‍රකාශ කිරීම රාජ්‍ය සේවය බරපතල ලෙස හෑල්ලූවට ලක් කිරීමක් බවත් ස්ටාලීන් මහතා වැඩිදුරටත් පැවසීය.
