මින් ඉදිරියට ජනාධිපති ගෝඨාභය රාජපක්ෂ මහතාට ජාතිය ඇමතීමට නව ජනාධිපති මාධ්‍ය මධ්‍යස්ථානයක් නිර්මාණය කර තිබෙන බව ජනාධිපති මාධ්‍ය ප්‍රකාශක කිංස්ලි රත්නායක මහතා පවසනවා.
අංග සම්පූර්ණ නවීන තාක්ෂණික ක්‍රමවේදයන් භාවිතා කරමින් ඇමරිකානු පන්නයට නිර්මාණය කරන ලද මෙම මාධ්‍ය මධ්‍යස්ථානය එළැඹෙන 29 වනදා විවෘත කිරීමට නියමිත බවයි ජනාධිපති මාධ්‍ය ප්‍රකාශකවරයා සදහන් කරන්නේ.
ජනාධිපතිවරයාට මෙන්ම ජනාධිපති මාධ්‍ය ප්‍රකාශකවරයාටද සතිපතා මාධ්‍යවේදීන් හමුවීමටත් ප්‍රවෘත්ති සාකච්ඡා පැවැත්වීමටත් මෙම ස්ථානය භාවිතා කරන බවයි පැවසෙන්නේ.
මීට පෙර ජනාධිපතිවරයා ජාතිය ඇමතූ අවස්ථාවන්හීදී ඒවායේ අඩුපාඩු කියමින් විවිධ චෝදනා එල්ලවූ බවත් මින් අනතුරුව ජාතිය ඇමතීමට මෙම ස්ථානය පමණක් භාවිතා කරන බවත් ජනාධිපති මාධ්‍ය ප්‍රකාශකවරයා සදහන් කරනවා.
කෙසේ වෙතත් නව ජනාධිපති මාධ්‍ය මධ්‍යස්ථානයේ නාම පුවරුව රාජ්‍ය භාෂා ප්‍රතිපත්තිය උල්ලංඝණය කරමින් ප්‍රදර්ශනය කර ඇති බවට මේ වන විටත් චෝදනා එල්ලවනවා.
රාජ්‍ය භාෂා ප්‍රතිපත්තියට අනුව සිංහල භාෂාවට හා දෙමළ භාෂාවට ප්‍රමුඛත්වය දිය යුතු අතර ඉන් අනතුරුව අනෙකුත් භාෂාවන් භාවිතා කිරීමට අවස්ථාව හිමිවනවා.
කෙසේ වෙතත් නව ජනාධිපති මාධ්‍ය මධ්‍යස්ථානයේ ජනාධිපති කාර්යාලය ලෙස සදහන් පුවරුවේ පළමුව සිංහල භාෂාවත් දෙවනුව ඉංග්‍රීසි භාෂාවත් තුන්වන භාෂාව ලෙස දෙමළ භාෂාවත් යොදා ඇති අයුරු දක්නට ලැබෙනවා.
එමෙන්ම සිංහල භාෂාවෙන් ජනාධිපති කාර්යාලය ලෙස සදහන් වුවද එය ඉංග්‍රීසි භාෂාවෙන් President Secretariat ලෙස සදහන්ව තිබෙනවා.
ඉංග්‍රීසි භාෂාවෙන් President Secretariat ලෙස හදුන්වන්නේ ජනාධිපති ලේකම් කාර්යාලයයි.
