ලංකා සතොස ආයතනයට භාණ්ඩ මිලදී ගැනීමේ ටෙන්ඩර් මණ්ඩලය අහෝසි කර ඒ සඳහා ස්ථාවර අමාත්‍ය මණ්ඩල ප්‍රසම්පාදන කමිටුවක් පත් කිරීමට රජය තීරණය කර ඇත.
වෙළඳ ඇමති ආචාර්ය බන්දුල ගුණවර්ධන ඉදිරිපත් කරන ලද යෝජනාවකට අනුව කැබිනට් මණ්ඩලය ඒ සඳහා අනුමැතිය දී තිබේ.
ටෙන්ඩර් කමිටුව සති දෙකක් ඇතුළත පිහිටුවීමට නියමිත අතර මුදල් අමාත්‍යාංශයේ, පාරිභෝගික සේවා අධිකාරියේ සහ ලංකා සතොස ආයතනයේ නියෝජිතයා බැගින් එම කමිටුවට අයත් වේ.
සතොස ආයතනය මිලදී ගත් භාණ්ඩවලට මුදල් නොගෙවීම නිසා, සතොස ආයතනයට භාණ්ඩ ලබා නොදීමට සැපයුම්කරුවන් තීරණය කර ඇතැයි පසුගිය සතියේ සන්ඩේ ටයිම්ස් පුවත්පත වාර්තා කර තිබුණි.
