දකුණුදිග චීනයේ යුනාන් ප්‍රාන්තය ආශ්‍රිතව කොවිඩ් රෝගීන් සමූහයක් වාර්තා වී ඇතැයි විදෙස් මාධ්‍ය පවසයි.
යුනාන් ප්‍රාන්තයේ මියන්මාර දේශසීමාවට නුදුරු රැයිලි සහ ලෝන්චුවාන් ප්‍රදේශ ආශ්‍රිතව මෙසේ ආසාදිතයන්ගේ වර්ධනයක් සිදුව ඇතැයි සදහන් වේ.
ආසාදිතයන්ගෙන් බහුතරය මියන්මාරයේ සිට ආපසු චීනයට පැමිණි චීන ජාතිකයන් බවද එම වාර්තාවල දැක්වේ.
ඔවුන්ගෙන් වෛරසය ප්‍රදේශයේ ජනතාව අතරටද ව්‍යාප්ත වී ඇති බවත් මේ හේතුවෙන් දෛනික ආසාදිතයන් සංඛ්‍යාවේ වැඩිවීමක් සිදුව ඇති බවත් සදහන් වේ.
මෙය ඩෙල්ටා ප්‍රභේදය මුල් කරගෙන චීනයේ වාර්තා වූ දෙවන කොවිඩ් පොකුරයි.
මීට පෙර මැයි සහ ජූනි මාසවල චීනයේ දකුණු ගුවන්ඩොන්ග් ප්‍රාන්තය ආශ්‍රිතව ද ඩෙල්ටා ප්‍රභේදය මුල් කරගත් කොවිඩ් පොකුරක් වාර්තා විය.
