මේ වන විට කොවිඩ් 19 වෛරසය ආසාදිතව පෞද්ගලික රෝහලක ප්‍රතිකාර ලබමින් සිටින ජිප්සීස් ගායක කණ්ඩායමේ නායක සුනිල් පෙරේරා මහතා මිය ගිය බවට පැතිරෙන කටකතා අසත්‍යක් බව ඔහුගේ සොහොයුරු පියල් පෙරේරා මහතා පවසනවා.
ඔහු සදහන් කරන්නේ රෝගී තත්ත්වයෙන් පසුවී ඔක්සිජන් ආධාරයෙන්ද ශ්වසන පහසුකම් ලබාගත් සුනිල් පෙරේරා මහතා මේ වන විට ක්‍රමයෙන් සුවවෙමින් සිටින බවයි.
එබැවින් සමාජ මාධ්‍ය හරහා ප්‍රචාරය වන එම අසත්‍ය පුවත සම්පූර්ණයෙන්ම බැහැර කරන බව පියල් පෙරේරා මහතා සදහන් කළා.
මේ අතර ජිප්සීස් සංගීත කණ්ඩායමේ කීබෝඩ් වාදන ශිල්පී දුෂාන් ජයතිලක මහතාද සඳහන් කළේ සුනිල් පෙරේරා මහතා මියගිය බවට සමාජ මාධ්‍ය තුළ පලවන පුවත් අසත්‍ය බවයි.
පුද්ගලයෙක් දරුණු වසංගත තත්ත්වයෙන් රෝගාතුරව සිටින මෙම අවස්ථාවේදී එවැනි අසත්‍ය තොරතුරු ප්‍රචාරය කිරීමෙන් වැළැකී සිටින ලෙස ඔහු ඉල්ලා සිටිනවා.
