වර්තමානයේ සිදුවන මරණවලට කොරෝනා මර්දන කාර්ය සාධක බලකාය වගකිව යුතු බවට හිටපු අග්‍රාමාත්‍ය සහ එක්සත් ජාතික පක්ෂ නායක රනිල් වික්‍රමසිංහ මහතා පවසනවා.
විශේෂ ප්‍රකාශයක් කරමින් ඒ මහතා පවසන්නේ මේ නිසා එම බලකාය වහාම විසුරුවා හැරිය යුතු බවයි.
වසංගත සම්බන්ධ ප්‍රාමාණික දැනුමැති වෛද්‍ය විශේෂඥයන් සිටියදී ඔවුන් පසෙකට දමා වසංගතය පිළිබඳ සියලු බලතල ජනාධිපති කාර්ය සාධක බලකාය වෙත ලබාදුන් නමුත් ඉන් කිසිදු ප්‍රතිඵලයක් ලැබී නොමැති බවත් එම කාර්ය සාධක බලකාය ව්‍යවස්ථානුකූල නොවන බවත් රනිල් වික්‍රමසිංහ මහතා වැඩිදුරටත් පවසනවා.
එය විසුරුවා හැරීමෙන් අනතුරුව නීතියෙන් පිහිටුවා ඇති මණ්ඩල මාර්ගයෙන් සෞඛ්‍ය විශේෂඥයන්ට වසංගතය පිළිබඳ තීන්දු ගැනීමේ බලය ලබාදිය යුතු යැයි ද එසේ නැතිනම් ලංකාව 21වන ශත වර්ෂයේ විශාලා මහනුවරක් බවට පත්වීමේ අවදානමක් ඇතැයිද හිටපු අගමැතිවරයා පවසනවා.
