තලේබාන් පාලකයන් විසින් සිය සේවය සදහා වාර්තා කළ කාන්තා මාධ්‍යවේදිනියන් විශාල පිරිසක් ආපසු හරවා යවා ඇතැයි වාර්තා වේ.
ඇෆ්ගනිස්තාන ජනමාධ්‍ය සංවිධාන සදහන් කර ඇත්තේ කාන්තා මාධ්‍යවේදිනියන්ට සුපුරුදු ලෙස සේවය සදහා අවස්ථාව ලබාදෙන බව තලේබාන් සංවිධානය අවස්ථා කිහිපයකදී ප්‍රකාශ කළත් ප්‍රායෝගික භාවිතය ඊට හාත්පසින්ම වෙනස් බවයි.
ඇෆ්ගනිස්තාන ගුවන් විදුලි රූපවාහිනී සේවයේ නිවේදිකාවක වන සබ්නම් ඛාන් දව්රාන් පවසා ඇත්තේ සේවය සදහා වාර්තා කිරීමට ගිය ඇයව පාලනය වෙනස් වී ඇති බව සදහන් කරමින් ආපසු හරවා එවූ බවයි.
කදීජා නම් මාධ්‍යවේදිනියක්ද තලේබාන් සාමාජිකයන් තමන්ව ආපසු හරවා එවූ බව සදහන් කර තිබිණ.
තලේබාන් සංවිධානය ඇෆ්ගනිස්තානයේ රූපවාහිනී සහ ගුවන් විදුලි මාධ්‍යවල වැඩසටහන් සංයුතිය ද සම්පූර්ණයෙන්ම වෙනස් කර ඇති අතර සියලු ආකාරයේ සංගීත, නාට්‍ය වැඩසටහන් තහනම් කර ඇති අතර ඒ වෙනුවට ආගමික වැඩසටහන් විකාශය කරන ලෙසට නියෝග පනවා තිබේ.
