මෙරට ඕනෑම එන්නත් මධ්‍යස්ථානයකින් ඕනෑම අයෙකුට පළමු එන්නත ලබාගැනීමේ හැකියාව ඇති බවට රාජ්‍ය ඖෂධ නීතිගත සංස්ථාවේ සභාපති විශේෂඥ වෛද්‍ය ප්‍රසන්න ගුණසේන මහතා සිදුකල ප්‍රකාශයත් සමඟ එන්නත්කරණ වැඩසටහන තුළ අර්බුදයක් ඇතිවී ඇතැයි මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසනවා.
ඔහු පවසන්නේ වෛද්‍ය ප්‍රසන්න ගුණසේන මහතාගේ ප්‍රකාශය තුළින් නැවත වරක් අනාවරණය වන්නේ රටේ එන්නත්කරණ වැඩසටහන බිම් මට්ටමේ ක්‍රියාත්මක වන ආකාරය පිළිබදව කොවිඩ් මර්දන කාර්ය සාධක බලකාය නොදන්නා බව තහවුරු වන බවයි.
ඒ ඒ දිස්ත්‍රික්කවල එන්නත්කරණ මධ්‍යස්ථානවලට එන්නත් ප්‍රමාණයන් නිකුත්කරනුයේ ඒ ඒ සෞඛ්‍ය වෛද්‍ය කොට්ඨාශවල ජනගහනය පාදක කරගනිමින් බවත් එම කොට්ඨාශයට පිටින් පැමිණි පුද්ගලයින් එන්නත් ලබාගතහොත් අදාළ කොට්ඨාශයේ ජනතාව අපහසුතාවයට පත්වන බවත් උපුල් රෝහණ මහතා පෙන්වා දෙනවා.
පසුගිය සති කිහිපය පුරාවටම එන්නත්කරණ මධ්‍යස්ථානවල ගැටළු ඇතිවූයේත් අදාළ කොට්ඨාශයට පරිබාහිරව පැමිණී පුද්ගලයින් එන්නත් ලබාගැනීම හේතුවෙන් බවද ඔහු වැඩිදුරටත් පවසනවා.
එබැවින් තමන්ට අදාළ නොවන ග්‍රාම නිලධාරී කොට්ඨාශයකින් එන්නත ලබාගැනීමට කිසිදු අවස්ථාවක් හිමි නොවන බවත් එලෙස එන්නත් ලබාගැනීමට ගොස් අනවශ්‍ය අර්බුද නිර්මාණය නොකරන ලෙසටත් මහජන සෞඛ්‍ය පරීක්ෂකවරුන්ගේ සංගමය ඉල්ලා සිටිනවා.
ඊට අදාළ දර්ශන මෙතනින්
