කාබුල් ගුවන් තොටුපල අසලදී සිදුකළ එක්සත් ජනපද ඩ්‍රෝන් ප්‍රහාරයකින් ළමයින් හය දෙනෙකු ඇතුළුව එකම පවුලේ දස දෙනෙකු ජීවිතක්ෂයට පත් වී ඇතැයි වාර්තා වෙනවා.
ඉරිදා දිනයේ, කාබුල් ගුවන් තොටුපල ත්‍රස්ත ප්‍රහාරයට වගකිව යුතු ඉස්ලාමීය රාජ්‍ය අනුබද්ධ ISIS -K හි සාමාජිකයෙකු ගමන් ගත් බවට සැක කෙරෙන වාහනයක් ඉලක්ක කරගනිමින් ඇමරිකානු හමුදාව එල්ල කළ ඩ්‍රෝන් ප්‍රහාරයකට නිවසින් පිටත නවතා තිබූ මෝටර් රථය විනාශ වී තිබුණේ දස දෙනෙකුට ජීවිත ද අහිමි කරමින්.
‘ඇයි ඔවුන් අපේ පවුල මැරුවේ? අපේ දරුවන්? ඔවුන්ගේ සිරුරු සහ මුහුණු හඳුනාගත නොහැකි තරමට පිළිස්සී ගොස් තිබෙනවා’ කෝපයට පත් ඥාතියෙකු වන රමින් යූසුෆි කඳුළු සලමින් BBC වාර්තාකරුවන්ට පවසා තිබෙනවා.
පවුලේ ඥාතීන් මේ පිළිබඳ චෝදනා කරමින් පවසා ඇත්තේ එක්සත් ජනපද ප්‍රහාරය ‘වැරදි තොරතුරු මත සිදු වූ ම්ලේච්ඡ ප්‍රහාරයක්’ බවයි.
36 හැවිරිදි සෙමරේ අහ්මාදි සහ පිළිවෙලින් වයස අවුරුදු 20,16,12 වයස්වල පසුවන ඔහුගේ පුතුන් වන සමීර්, ෆයිසාල් ප්‍රහාරයට ගොදුරු වුණා. ඔහුගේ වයස අවුරුදු දෙකක සුරතල් දියණිය මාලිකා අහ්මාදි ද මිය ගිය බව පවුලේ ඥාතීන් පැවසුවා.
සෙමරේගේ ලේලියන් සහ බෑණනුවන් හය දෙනෙකු ද මෙම ප්‍රහාරයෙන් ජීවිතක්ෂයට පත්ව තිබෙනවා. අවුරුදු දෙකක පිරිමි ළමයෙක් සහ ගැහැණු ළමයෙක්, අවුරුදු පහේ සහ හතේ වයසේ ගැහැණු ළමයින්, හය හැවිරිදි පිරිමි ළමයෙක් සහ 28 හැවිරිදි පිරිමි ළමයෙක් ද ප්‍රහාරයෙන් ජීවිතක්ෂයට පත් වුණා.
මේ අතර, පෙන්ටගනයේ මාධ්‍ය ලේකම් ජෝන් කර්බි පවසා ඇත්තේ සිවිල් වැසියන්ගේ ජීවිත හානි පිළිබඳ වාර්තා සම්බන්ධයෙන් එක්සත් ජනපද බලධාරීන්ට තර්ක කළ නොහැකි බවයි. එමෙන්ම එක්සත් ජනපද හමුදාව තරම් සිවිල් වැසියන්ට සිදුවන අනතුරු වළක්වා ගැනීම සඳහා පෘථිවිය මත කිසිඳු හමුදාවක් වෙහෙස මහන්සි වී වැඩ නොකරන අතර අහිංසක ජීවිත බිලි ගන්නවා දැකීමට කිසිවෙකුට අවශ්‍ය නැති බව ඔහු සඳහන් කර තිබෙනවා.
