පාස්කු ඉරිදා සිදු වූ ත්රස්ත ප්රහාර මාලාව සිදුකළ විත්තිකරුවන් 25 දෙනෙකුට නීතිපතිවරයා විසින් මහාධිකරණය හමුවේ ගොනුකර ඇති චෝදනා 23, 270 කින් සමන්විත අධි චෝදනා විභාග කිරීම සඳහා අගවිනිසුරුවරයා විසින් ත්රිපුද්ගල විනිසුරු මඩුල්ලක් පත්කර තිබෙනවා.
ඒ අනුව එම ත්රිපුද්ගල විනිසුරු මඩුල්ලේ සභාපතිවරයා ලෙස මහාධිකරණය විනිසුරු දමිත් තොටවත්ත මහතා පත්කර ඇති අතර විනිසුරු මඩුල්ලේ සෙසු සාමාජිකයින් වන්නේ අමල් රණරාජා සහ නවරත්න මාරසිංහ යන මහාධිකරණ විනිසුරුවන් දෙපළයි.
මෙම නඩුවේ විත්තිකරුවන් ලෙස නව්ෆර් මවුලවී, සජිඩ් මවුලවී, මොහොමඩ් මිල්හාන්, සාදික් අබ්දුල් හක්, ෂාහිඩ් අබ්දුල් හක්, ආදම් ලෙබ්බෙ හෙවත් ගෆූර් බාබා, මොහොමඩ් සම්සුඩීන්, මොහොමඩ් රිස්වාන් යන සැකකරුවන් ඇතුළු සැකකරුවන් විසි පස්දෙනෙකු නම් කර තිබෙනවා.
2019 අප්රේල් මස 21 වන දින කතෝලික දේවස්ථාන 02ක්, කිතුණු දේවස්ථානයක්, තරු පන්තියේ හෝටල් 03ක් ඇතුළු දිවයිනේ ස්ථාන 08ක සිදුවූ පිපිරීම් 10කට අදාළව ත්රස්තවාදය වැළැක්වීමේ පනත යටතේ කුමන්ත්රණය, සූදානම් කිරීම, ආධාර අනුබල දීම, පුපුරණ ද්රව්ය හා ආයුධ එකතු කිරීම, මිනීමැරුම් සහ මිනීමැරීමට උත්සාහ කිරීම යන චෝදනා මත සැකකරුවන් මෙම සැකකරුවන් 25 දෙනාට එරෙහිව අධි චෝදනා 23,270ක් මහාධිකරණය හමුවේ ගොනුකර තිබෙනවා.